بالسوري الفصيح

صدى الشام/

على اعتبار إنو بلشت الشتوية، وبلش البرد، فلازم نتزكر إنو الشتوية بدها صوبية والصوبية بدها مازوت، والمازوت بدو مصاري، والمصاري بدها شغل، والشغل بدو بلد، والبلد… لحظة لحظة كأنو خربطت، خلوني عيد من الأول، الشتوية بدها صوبية، والصوبية بدها مازوت، والمازوت بدو مصاري، والمصاري… شو يعني مصاري؟ والله عم احكي جد ما عم امزح شو يعني مصاري؟ لأنو من حوالي كزا سنة نسينا شو يعني الواحد يكون عندو مصاري، صرنا ناخد الراتب من هون يخلص بنفس اليوم أو تاني يوم بالكتير، وبعدين نبلش نتدين، من هون ألف ومن هون ألفين، وبس نقبض أول الشهر نرجع على نفس الحكاية بيخلصوا المصاري، يعني من سنتين قدرنا نشتري بيدونين مازوت بكل الشتوية، بس السنة الماضية ما اشترينا ولا لتر مازوت واتدفينا بالبطانيات، كنا نقعد تحت البطانيات من الصبح للمسا، ولما يجوا لعنا ضيوف بنعطيهن بطانيات وبنقعد، الولاد بيدرسوا وهني لافين حالهن، أنا بتفرج ع الأخبار وأنا متخبي تحت البطانية، وهالسنة أكيد رح نعيش نفس الأوضاع، ويمكن نبيع الصوبية منشان نشتري كم بطانية احتياط لأنو بنت خالة مرتي بدها تيجي لعنا كم يوم، على اعتبار جوزها سافر من سنة وصار بألمانيا ومستنية لم الشمل، بس لأنو لم الشمل تأخر وبيقولوا في قوانين جديدة ويمكن يتأخر أكتر، المخلوقة ما عاد قدرانة تدفع آجار البيت، ولا قدرانة تروح لعند أهلها لأنهن ساكنين بحلب، لهيك قررنا نأجرها أوضة مفروشة عنا بالبيت هي وأولادها التلاتة، ولأنو هي درويشة متل حكايتنا فقررنا إنو ما ناخد منها أجرة، يعني الناس لبعضها، وإن خليت بليت متل ما بيقولوا، صحي نحنا يا دوب عم نقدر ندبر حالنا بس شو بدنا نساوي، الناس كلها عايشة هيك، يعني مو كل الناس أكيد لأنو في ناس متل جارنا أبو سليم حياتهن غير يا عمي من خمس سنين لهلأ صار عندو تلت سيارات وبيتين وبيقولوا إنو عندو أرض بيعفور وسوبر ماركت بأول جرمانا، مع إنو يعني هو شقفة مساعد بالمخابرات مو ضابط… لك ولسه بدكن حرية؟!