بالسوري الفصيح

صدى الشام /

طيب بلد رئيسو بشار الأسد، ورئيس وزراؤه عماد خميس، وجيشو اسمو جيش أبو شحاطة، برأيكن غريبة يكون يسر دولي شاعر كبير فيه مثلاً؟ والله عنجد عم احكي، يعني ما ضل حدا ما استغرب كيف وزارة السياحة بتعطي جائزة للمدعو يسر دولي على اعتبار إنو ما بيستاهل ياخد هيك جائزة لأنو لا موهوب ولا شاعر، ولا أي شي، على أساس من يوم يومنا بسوريا بنعطي جوائز لناس بيستحقوها، أو بنحترم المبدعين الحقيقيين أصلاً. طيب بنفس هاي البلد اللي شعبها زعلان كتير بسبب يسر دولي بيطلع واحد اسمو هادي بقدونس بيعزف ع الكمان وبيلعن أبو الموسيقا، وبيغلط شي الفين غلطة بمعزوفة موسيقية وحدة، هادا الهادي بقدونس صارلوا أكتر من عشرين سنة بيقولوا عنو الفنان الكبير، ويمكن ما في يوم ما بيطلع ع التلفزيون بيعزف متل اللي حامل منشار وعم ينشر خشب، ومع هيك ما سمعنا حدا احتج عليه. وكمان عادي صاروا يقولوا عن مصطفى الخاني النمس إنو ممثل كبير، ويقولوا عن سولاف فواخرجي إنها ممثلة كبيرة، يعني كل هالشغلات اللي بتشوفوها عادية جداً وما بتستاهل الواحد يحكي فيها أو يحكي عنها، هيك بلد لازم تتوقعوا منو كل شي، كل شي يعني كل شي، لما عملوا للبوط العسكري تمثال وراحوا المسؤولين افتتحوه، ولما طلعت إعلامية عم تبوس البوط العسكري على الهواء مباشرة، ولما يعتبروا تركيب صراف آلي بطرطوس إنجاز وبيروحوا يفتتحوه، كل هالشغلات عادية، بس إنو يسر دولي ياخد جائزة وبينقال عنو شاعر كبير هيك بيصير الأمر مو عادي أبداً… لأ حبيباتي والله إذا ما عملوا هيك بيكون الموضوع غلط تاريخي، يعني خدوا الأمور ببساطة وشوفوا كم واحد صار “كاتب كبير” من أول الثورة لهلأ، وكم وحدة صارت ناشطة مهمة وصاحبة رأي، وكم ناشط صار صحفي مهم، وكم ولد صار سياسي، وكم مهرج صار اسمو فنان ثوري يعني عادي، متل ما النظام عندو يسر دولي، الثورة كمان فيها يسر دولي… يعني بصراحة دود الخل منو وفيه… تحية للشاعر الكبير يسر دولي…