بالسوري الفصيح

صدى الشام/

قال رضينا بالهم والهم ما رضي فينا، صرنا وين ما نروح ووين ما نتحرك بالشام يوقفونا الحواجز، قلنا ماشي الحال، الجماعة عم يحموا البلد من المؤامرة الكونية متل ما بيقولوا، صارت الحواجز تصادر منا غراض وخضرة وفواكه، قلنا ماشي الحال، خليهن يشبعوا حالهن، لأنو هني معودين ع السلبطة والتشليح، بعد شوي صارت الحواجز تبيع دخان مهرب، قلنا منيح خليهن يتسببوا مو هني طول عمرهن يبيعوا دخان وبيشتغلوا بالتهريب.

كان في بمنطقتنا حاجزين واحد بأول المنطقة، للجوية، والتاني بآخر الحارة، للسياسية، بعدين صار في حاجز بالنص لأمن الدولة، وحاجز قدام المدرسة للشرطة العسكرية، وقدام الفرن حاجز للدفاع الوطني، وكلو ماشي وعادي وما في أي مشاكل.

نحنا شعب حباب بناكل الكف من هون وبنقول يا محلاه، عادي الله وكيلكن الشباب ع الحواجز صاروا مننا وفينا، بنعرف أسماءهن، وأسماء ولادهن ونسوانهن وصاحباتهن، وهني بالمعية بيعرفوا كل بيت شو بيطبخ، ويا ويلوا اللي بيطبخ محشي وما بيسكبلهن لجماعة الجوية ما بيعود يخلص منهن لا بالفوتة ولا بالطلعة، ولما يكونوا شباب الحواجز مبسوطين وجايي كيفهن ويحبوا يسهروا المنطقة كلها ما بتنام، الشباب بيسكروا وبيبلشوا عتابات ومواويل للصبح، وممكن شي واحد منهن يسلطن ويخلعلوا شي مخزن روسية على هوا السحبة، وكلو عادي، ما حكينا ولا شكينا.

بس من شي سبع تسع شهور، صار عنا حاجز جديد قدام الجامع، وهالحاجز غير الحواجز التانيين لأنو كلو أجانب، مو ألمان وفرنسيين، لأ بس شي لبنانيين على عراقيين، على أفغان على ما بعرف شو، يعني حاجز متنوع ربطات مكتوب عليها “يا حسين” و”لن تسبى زينب مرتين”، وهيك حركات يعني، هدول بس اللي جننوننا، لأنهن ما بيهدوا لا ليل ولا نهار، عاملين مناوبات وعم بيراقبوا البيوت والمحلات، وما بيخلوا شي يغيب عن عينهن لحظة وحدة، ما بيضحكوا ولا متل التانيين بيحبوا المحشي والحراق بإصبعو، عابسين على طول، من شي اسبوعين بلشوا  يلاحقوا الناس، ويفتشوهن، و صاروا يسبونا بالعربي وبالفرنجي كمان، قال شو نحنا قتلة الحسين، يا حبيبي الله وكيلك مو نحنا، لك يا روحي أنا أبي اسمو حسين وابن اختي اسمو حسين…

صرنا ننام مفتحين عيونا الله وكيلكن، لأنوهدول الجماعة جايين ياخدون بالتار مننا نحنا، يا حبيبي كنا بمؤامرة كونية صرنا بجريمة تاريخية… ودبرها إذا فيك تدبرها، مو قلتلكن رضينا بالهم والهم ما رضي فينا.