بالسوري الفصيح

صدى الشام/

صاحبي أبو شيركو إلو كم يوم مكركب ومو عرفان راسو من رجليه، طول الوقت صافن وما عم يحكي مع حدا، المسويات حملت حالي ورحت لعندو ع المحل قلت بطمن عليه، الزلمة عشرة عمر.

• لك خير شو بك شو صاير معك؟
• خليها على الله والله رح جن
• بعيد الشر شو صاير محتاج مصاري؟
• لا يا زلمة مصاري شو، الحمد لله خير الله كتير
• حدا مرضان حدا معتقل؟
• لا الحمد لله ما في شي من هالشي
• لكن شوبك يازلمة والله شلشتني؟
• اسماع يا سيدي، امبارح ابن خالتي هادا اللي بألمانيا، عرفتو؟
• إي عرفتو مو هادا اللي كان بيشتغل بالازاعة
• أيوا هوي بزاتو
• أي شوبو، بدهن يرحلوه شي؟
• لك يا ريتهن يرحلوه على جهنم
• العما العما، طول بالك، خير شوبو ابن خالتك
• يا سيدي من كم يوم حاكاني وقللي حاضر حالك أبو شيركو بدنا نروح على روج آفا، سألتو شو هاي روج آفا، قللي دولتنا
• دولة شو؟
• إي طول بالك جايك بالسيرة، سألتو متلك هيك: دولة شو
• قللي دولة كوردستان سوريا
• يا لطيف
• متل ما عم حاكيك، طلع العينتين عم يشتغل مع جماعة هدول اللي بدهن يعملوا فدرانية ما بعرف شو
• قصدك فدرالية
• لك عمي فدرالية فدرانية كلو اضرب من بعضو
• أي وشو قلتلو انت
• شو بدي قلوا يعني لعنت أبوه على أبو دولتو وسكرت الواطس وما عاد فتحتو… قال بدو يعمل دولة قال، ليش نحنا مو سوريين، كيف قدر يفكر هيك هالمصروع، انت بتعرف انو ما بيعرف ولا كلمة كردي، وكل ما كنا نحاول نعلمو كان يقول حلوا عني، وبتعرف إنو أبوه الله يرحمو كان استاز محترم، ولما توفى طلعت الناس كلها بجنازتو، ما حدا قال هادا عربي وإلا كردي.. بس هالولد مصروع… لك كيف بيقدر يصير شي تاني غير سوري، عمي نحنا كراد سوريين من طول عمرنا… وبحياتنا ما راح نصير غير كراد سوريين…
• طول بالك أبو شيركو… شغل ولاد
• لك عمي والله ما حدا ضيعنا غير الولاد… ليش لو ما هالولد ابن الحرام كان صار بسوريا اللي صار… ولد خرب بلد.. ويا خوفي من هالولاد يخربوها بزيادة…