بالسوري الفَصيح

شو أبو الشباب مو كأنو الجيش البطل تبهدل وأكل…. هوا، شو كأنو ما عد
لقيانين كف، لك ع القليلة خليكن راكزين بالشام، لسه صاروخين، لك صاروخين هريتو
هرران متل الفيران، لك فهمنا بإدلب، لك بحلب، لك بحماه، بحمص، بس بالشام، له له،
والله ما كان العشم، وما حبيتها منكن منوب منوب، سودتو وشنا قدام ضيوفنا الروس،
يعني ما بيصير تعزموهن وانت ما بتمونوا على طيــــــــارة تطيروها بالجو، يعني ما
خرج تاخدوهن سيران ع الغوطة، ولو والله عيب، شو هالبهدلة، يعني الجماعة جايبين
نسوانهن وعم يضيفوا المفتي وغير المفتي، ويا خطيتهن هالروسيات الحلوات صورهن كلها
بغرف النوم…. عفواً قصدي بالمكاتب يعني لا طلعوا على قاسيون، ولا راح يقدروا
يطلعوا ع الزبداني، بهدلة إي عن جد بهدلة، يا عيب الشوم يا جيش الوطن، هيك، هيك يا
زلمة، تتبهدل وتلبس خفافات مع إنو الروس جايبلك معهن بواط عسكرية ماركة بوطين، بوطين
مو بوط واحد، وين لح تروح هالبواط؟ ولمين بدك تتركهن، ما ضل مكان ما قفزت منو متل
الأرنب أبيض أبيض مثل النور، قال وأحلى شي لما تسمع تحقيق الانتصارات، هاي تحشيشة
عن جد، ولك يا بني آدمين انتصارات شو؟ ومعارك شو؟ يعني جماعة أبو نص ليرة، وإيران،
وأبو الفضل العباس، والأفغان وهلأ إجو الروس مع نسوانهن، يا سيدي منشان ما حدا
يزعل، ومع هيك لهلأ ما عرفتوا ترجعوا حارة، لك حارة واحدة، يا سيدي مو حارة، حاجز،
لك حاجز، يا جيش الوطن، حاجز من تبع الخمسة وعشرين زلمة، ما بتقدروا؟ ولو، طيب
استولوا على شي بيكاب، لك ميتور، شو ما عم يطلع معكن شي، شو محتاجين، عن جد عم
احكي شو محتاجين، لا زينبيات نفع معكن ولا غير الزينبيات، هلأ جابولكن روسيات، لك
والله مو حلوة، مو منشان شي، بس منشان المسداقية، يعني جيش طويل عريض ما بيقدر
يستولي على ميتور… إي لأأأأأأ عن جد تخنتوها… قال شو هذا حامي الحما، لا وحياة
جوز خالتي ما بيطلع بإيدكن تحموا…. طيـــــــــــر طاير. بخاطركن.