بالسوري الفَصيح

إنو إي شو يعني الواحد ما بقا عندو أي شي يساويه بهالحياة غير يتابع
الأخبار؟ عادي ما هيك؟ بتفيق من النوم بتشوف الأخبار، بتقعد لتتزهرم بتشوف
الأخبار، قبل ما تنام بتشوف الأخبار، وبين الأخبار والأخبار في نشرة أخبار، مرتك
عندها نشرة أخبار، وابنك عندو نشرة أخبار، وجارك اللحام عندو نشرة أخبار، والخضرجي
كمان عندو نشرة أخبار، بنت خالتك بتحكي معك ع السكايب بتخبرك نشرة أخبار، بتروح
لتشتري بوط رياضة انتو أكبر قدر بتسمع شي تلاتين نشرة أخبار، بالسرفيس، بالمحل،
عند بياع الفلافل، بالشغل، بس المكان الوحيد اللي ما فيه نشرات أخبار بتعرفوا شو
هوي؟ التلفزيون العربي السوري، إي عن جد ما عم امزح، لأنو إذا جربت تشوف نشرة
الأخبار ع الفضائية السورية لح تقلب على ضهرك من الضحك، بتحس حالك عم بتشوف مسلسل
من تبعات الفنتازيا شي نسورنا الأبطال،
وشي أبطالنا البواسل، هلأ كيف نسورنا الأبطال بيصيروا بالجزء التاني أبطالنا
البواسل ما حدا بيعرف، وبعدين منشان تكمل الأجزاء بيصير في عندك المقاومة البطلة،
وبطولات المقاومة، وبعد شوي مقاومة الأبطال، إي ومنشان ما ننسى هالبطولات تبدا
بتدمير عشرات وقتل مئات، وحكي بيشبه حكي القهاوي، بتعرفوا لما شي واحد كزاب بيقعد
يستعرض بطولاتو، قتلتكن خمسين ضبع وعشر دياب، وسحبتن بإيدي لحتى وصلت ع الضيعة
لوحدي، وإذا إجا شي حدا وقطع السيرة بيتخربط كل الدوزان، ويخلط حكاية الضباع والديابة بحكاية
تانية، وهيك بيصير ببطولات فانتازيا التلفزيون السوري لما تيجي إسرائيل تعمل شي
غارة على شي موقع، فجأة هالجماعة بينسوا إنهن كانوا خاربين الدنيا، وبيصيروا يحكوا
عن احترام القانون الدولي، لك ولو وين بطولاتكن، وين غرندايزر تبعكن؟ وينو ابن
الوهاج اللي هلكوا للإرهاب؟ شو صار فيهن؟ قلتولي اعتداءات غاشمة ما هيك!! يقطع
عمركن ما اكزبكن، معقولة لهلأ ما بتعرفوا تعملوا نشرة أخبار.