بالسوري الفَصيح

أنا المواطن الصالح فلان ابن فلان الفلاني أقر وأعترف وأنا بكامل قواي
العقلية، أصلاً إزا بقيان عندي شي من القوى العقلية، المهم أقر وأعترف بأني خلص ما
بقى بدي انحسب ع المواطنين الصالحين اللي ماشيين الحيط الحيط وبيقولوا يا ربي
الستر، وحابب صير من ولادين الحرام اللي ما خلوا لولاد الحلال شي، هدول اللي وين
ما رحت تلاقيهن، بالنظام وبالمعارضة فرد شكل، عدم المؤاخزة من حضراتكن، نفس الشو
اسمو بس غير ريحة، هونيك قصدي بالمعارضة عم يشتغلوا متل المنشار بياكلوا ع الطالعة
وع النازلة لحتى خلوا الناس تكفر بالثورة، شي مو طبيعي بتقلهن إغاثة بيقلك بدنا
نلحس اصبعتنا، بتقلهن مشفى ميداني بيقلك إي شو بدو يطلعنا، لك بتقلهن معالجة جريح
بيقلك شوفلنا شي براني، علي الحلال شي بيطير العقل، ما بدهن يتركوا شغلة تمر من
دون ما يفصفصوا عظامها، وهادا اللي بدو سكرة وهادا اللي بدو يلحس أصابعو خلصت
الطنجرة وفضيت بالمرة، بيشاركوا الميت بكفنو، ان شاء الله ما بيلاقوا حق كفن، طيب
صارلكن أربع سنين وشوي، ما شبعتوا؟ ما انتفختوا؟ حاجتكن بقا اتركوا شي لهالشعب،
اتركوا شي لولاد الشهداء، للأرامل، للمعاقين، اتركوا شي لسوريا حرام عليكن، وأحلا
شي إنو كل واحد فيهن صار حاججلو شي تلت أربع مرات، وعاملو شي عمرتين، وكلو بحسابو،
وبيتصور وهو عم يطوف حول الكعبة، وبيسلخنا دعوة من هاي تبع يا رب ارأف بحال سوريا،
مو أول شي لتستحوا على دمكن هي ازا بقيان فيكن نقطة دم، لك وكل يوم والتاني بتطلع
قصة فساد جديدة بمؤسسات المعارضة، لك الله يخزيكن، على أساس انتو احسن من جماعة
ابو نص لسان طلعتو ألعن، هلأ وبصراحة ع الجنب التاني يعني جماعة النظام العوض
بسلامتكن هدول موضوعهن منتهي من زمان من قبل الثورة بسنين، بتتذكروا نكتة
الحرامية؟ طيب خلوني احكيلكن ياها، قال واحد عم يسأل رفيقو الموسيقي، قلوا إذا بدك
تألف موسيقا عن حرامي شو بتعمل، قلوا الموسيقي: بعمل ترم، قلوا واذا تنين حرامية،
قلوا بعمل ترم ترم، قلوا طيب اذا بلد كلها حرامية شوب تعمل؟ قلوا: هاي بسيطة كتير،
وصار يغني حماة الديار عليكم سلام.. وصلت؟ إي طيب بخاطركن.

واحد سوري