بالسوري الفَصيح

هلأ عن جد عندي
سؤال محيرني صارلو مدة، ليش نحنا السوريين بنضحك لما بنسمع حدا سوري بيقول شكون؟
ليش بنتمسخر على حدا بيقول أشو؟ أو شنو؟ ليش مين قال إنو كل السوريين من الشرق
للغرب ومن الشمال للجنوب لازم يقولوا شو؟ ليش سكتوا؟ ليش ما حدا عم يرد؟

طيب خلوني اسألكن
سؤال تاني، ليش المفروض على كل السوريين إنو يحكوا شامي، يعني بيطلع محلل سياسي من
حلب بيصير يحكي شامي مع إنو بحياتو ما سكن بالشام، طيب يا حبيباتي احكوا بلهجتكن،
ليش خايفين؟ أكيد رح يجي حدا ويسألني طيب هي إنته عم تكتب بالشامي كمان، أي بعرف
ما أنا اضرب منكن حبيباتي، ليش مين قال اني انظم، مو أنا كمان بتفشكل باللهجة
الشامية وين ما بروح، الادالبة بيحكوا شامي، الحماصنة بيحكوا شامي، لك أهل الرقة
وأهل الدير بيحكوا شامي، ولما بدوا واحد يقفل، أو يتفزلك بيقلك شو يا حبيب بدكن
حرية؟ بدنا حرية يرحم أبوكن، حرية انو الواحد يفتح التلفزيون ويلاقي لهجات سوريا
كلها ليش لأ؟ شو المشكلة اذا عملوا مسلسل ديري، أو درعاوي، مو منشان يتمسخروا، أو
يعملوا كوميديا غليظة متل تبع دنيا، لأ منشان يقولوا انو السوريين بيحكوا كل هاي اللهجات،
لأنو السوريين سبحان الذي خلقهن عندهن لهجات كتيرة، ومو كلهن كانوا ساكنين بحارة
الضبع، في حارات كتيرة بسوريا وفي بواب كتيرة غير هالباب المعفن تبع حارة الضبع
اللي ما إجانا منو غير البهدلة وقلة القيمة، في بواب طلعوا منها شباب متل الورد، غنوا
بصوت عالي: سوريا بدها حرية، وفي بواب تانية طلع منها مجرمين وحرامية، وفي بواب
تانية طلع منها أعضاء ائتلاف كمان، وعلى قولة فيروز وبواب بواب شي غرب شي صحاب، أي
عن جد، لأنو مو كل اللي بيقاقوا مجرمين، ولا كل مين لبس شروال قبضاي وشيخ الشباب.
فبقى الله يرضى عليكن، كل واحد يحكي بلهجتو ولا تخجلوا، التنوع حلو وسوريا بتقدر
توسعنا كلنا.

واحد سوري حابب
يتفزلك شوي