صدى الشام موقع يهتم بما وراء الحدث
بشرفكن هيك بلد مو لازم يعملوه تحفة عالمية؟
عنجد، من كم يوم طالع الضرسان ما غيرو مرسوم جمهوري انتو أكبر قدر، قال شو جنابو
مطالع شغلة اسمها بطاقة شرف، إي بعرف رح تقولوا ليش هوي فيه شرف ليعطي بطاقة شرف؟
بس استنوا لا تستعجلوا خلوني احكيلكن شو صار وبعدين نحكي بموضوع الشرف، قال هادا
يا سيدي في واحد ما لو علاقة بشي، يعني جادبها وماشي لا مع الثورة ولا مع النظام،
مدبر راسو كيف ما حدا بيعرف، المهم لما سمع بالمرسوم راح لعند مرتو وخلاها تبيع
دهباتها، وحمل هالمصريات وراح لعند جارو المساعد بالأمن العسكري، حط هالمصريات
قدامو وقلوا داخل على عرضك معلم دبرلي بطاقة شرف، المساعد عد المصريات، وهز كرشو
وقلوا لك روح ولك عمي هدول ناقصين خمسين الف.
دبرها معلم، يستر عرضك والله ما معي غيرهن.
وهيك على هاتني جيتك، لحتى وافق المساعد وحط
المصاري بجيبتو، تاني يوم جابلوا بطاقة شرف بتثبت إنو هوي أبو شهيد، طبعا مع إنو
ابنو الكبير عمرو سبع سنين بس، حمل هالبطاقة وراح ع البيت، ورجاها لمرتو وهوي
مبسوط، اتضايقت المخلوقة وعصبت وقالت لو هيك روحت الدهبات على هالبطاقة الفاضية.
لك شو فاضية يا مخلوقة؟ هاي بطاقة شرف، بكرا
بنصير نفوت ونطلع كيف ما بدنا، صرنا محسوبين ع الجماعة، لا حاجز يوقفنا ولا حدا
يقرب علينا، وبنقدر نشتغل شو ما بدنا، أنا أبو الشهيد وانتي أم الشهيد، مو بعيدة
يطالعونا بالتلفزيون لنحكي عن تضحية ابنا وكيف دافع عن كرامة البلد وما بعرف شو.
لك انت جنيت يا رجال؟ ابنا عمرو سبع سنين، كيف
بدنا نقول انو ابنا شهيد لا سمح الله؟
حطي بالخرج يا مخلوقة، ليش انشالله انتي مصدقة
كذبة شهداء الوطن؟ طول عمرها البلد ماشية هيك، سوريا دبر راسك، وهاي أنا عم دبر
راسي، وما حدا أشطر من حدا.
شو رأيكن؟ عنجد موهالبلد تحفة؟
واحد سوري
