بالسوري الفصيح

كنت بدي احكي عن أزمة المي
اللي عشناها بهالكم يوم اللي مرّوا، بس فجأة قررت أحكي عن صباح، إي صباح، الصبوحة،
الشحرورة، مو غريب هالشي؟ مبلى بيجوز يكون غريب، بس عن جد قديش هالست ملت حياتنا
وحياة أهلنا، ويمكن أجدادنا بالأغاني، وقديش في ناس دبكوا ورقصوا على أغانيها، لك
وقديش في شباب من خمسين ستين سنة كان طاير عقلهن فيها، وقديش في صبايا كمان كانوا
بيغاروا منها ويحسدوها، كانت حلوة كتير، وصوتها بيملا الشوارع، والاوووووووووف لما
كانت تقولها كانت ما بتشبهها أي اوف تانية، بس أنا ما كان بدي احكي عن فنها لأني
مو ناقد فني، بس بدي احكي عن لبنان، لأ لأ ما تنقزوا أنا ما عم خربط، هلأ زمان لما
كانت الناس تقول لبنان كان أول شي يخطر ببالهن فيروز وصباح ووديع، وعاصي ومنصور،
وسميرة توفيق، بس من ساعة اللي طلع غراب البين صرت بس تقول لبنان تقول أعوذ بالله
حسن نص لسان، وميشيل عون، وما بعرف مين كمان، يا حرام يعني بعد ما كان لبنان بلد
الفن صار بلد اللقاليق وعصابة حالش، متل عنا فرد شكل، يعني بعد كانت سوريا بلد
ماري وأوغاريت وإيبلا وأميسا، صارت أنتو أكبر قدر سوريا الأسد، يا عيب
الشوم علينا، بعد ما كانت الشام مدينة نزار قباني صارت مدينة الشبيحة والحرامية،
العما، قال وبيجي واحد ويقلك ليش طلعتو ثورة؟ لك نحنا بدنا 135 ثورة مو ثورة وحدة
وبس.

واحد سوري