صدى الشام موقع يهتم بما وراء الحدث
من كم يوم يا سادة يا كرام اتفرجت عند الحلاق على لقاء مع
“الأستاذ” خالد العبود نفسو ما غيرو تبع المربعات والدوائر، وهالمرة
قريت تحت اسمو إنو صاير أمين سر مجلس الشعب، المهم صاحبنا نازل سلخ بالكل ما حدا
عاجبو، ما خلا لا معارضة ولا حدا، عنجد هالزلمة ثروة وطنية، مليون مرة قال السيادة
الوطنية والانتصار والبطولات، وكيف إنو المعركة انتهت وما بقى شي بنوب، طلعت من
عند الحلاق رايح على بيتي وقفني حاجز
هويتك؟
تفضلوا،
وين كنت؟
والله عند الحلاق،
وشو عم تعمل عند الحلاق؟
عم شوف لقاء الأستاذ خالد العبود،
شو؟
إي والله
وليش ما تنضرب تشوف اللقاء ببيتك؟
لأنو ما عندي كهربا.
ها، ما عندك كهربا؟
إي والله من شي يومين ما إجت الكهربا، وحبيت شوف التلفزيون منشان أعرف
شوصاير بالدنيا
إي وعرفت شو صاير بالدنيا؟
إي الحمد لله الأمور بخير وما بقى في مشاكل، الحمد لله، الأستاذ خالد
العبود طمني كتير.
عظيم، طيب إنته شو بتشتغل؟
والله ولا شي عواطلي.
العما، ليش؟
ليش؟ لأنو كان عندي محل بجوبر، وجوبر….
إي خلاص فهمنا، طيب ما دورت على شغل تاني؟
مبلى، بس ما عرفت داوم لأنو الشغل كان بدوما
أيوا…
وشو ناوي تساوي؟
والله ما بعرف، بس عم فكر اشتغل صحفي.
ها، صحفي، وكيف هيك؟ ليش انت بتفهم بالصحافة ولاك؟
لا والله ما بفهم بالصحافة، ولهيك بدي اشتغل صحفي.
شلون بقى؟
معلم كل اللي عم يشتغلوا بأي شغلة ما عم يعرفوا شو عم يساووا ولا هي
شغلتهن، يعني وقفت عليي، سعري بسعر هالناس، بعدين أنا بعرف إنو المؤامرة كبيرة،
وبعرف المتآمرين واحد واحد.
عظيم، ليك خود هويتك وروح على بيتك، وسكر تمك أحسن ما تتبهدل، نحنا جيش حر،
وسلملي على خالد العبود لما تشوفوا وقلوا: خلصت مو هيك؟
