بالسوري الفصيح

علي الحلال يا جماعة هالزلمة طاقق عندو شرش الحيا وماشي،
يعني بنوب بنوب ما بيستحي، معليش لا تواخزوني عم اتطاول على مقام الرئاسة بس عنجد
لما شفتو من كم يوم عم يقسم ويخطب حسيت حالي عايش بكوكب تاني، لك شو هالزلمة هاد؟
واقف ولا على بالو شي وكأنو هالمصايب اللي صارت بغير مكان، مو بسوريا اللي قاعد عم
يتمنفخ وعامل حالو رئيس عليها، لك رئيس على شو؟ ما بتعرف شو عم يصير حواليك؟
وبعدين ليش ما رحت على مجلس الشعب؟ شو خايف تجيك شي قزيفة تفرح كل هالشعب، عنجد
حتى الموالين إلك قرفانين منك، وما عادوا قدرانين يتحملوا غلاظتك، وضحكك ع الطالع
والنازل متل المجانين، على شو عم تضحك ولاك؟ شو اللي مفرحك؟ شمتان بالسوريين مو
هيك؟ عامل حالك بطل، لك كانت باطلة ومحولة هديك الليلة لما شالوا من تمك الببرونة
وعملوك رئيس علينا، ما بيروح من بالي هداك اليوم، هادا يا سيدي من أربعطش سنة وقف
هالولد عم يهز بمجلس الشعب، قال شو الشعب بايعوا ليصير رئيس، أكلنا الكم بيوميتها
وقعدنا كان صابر فلحوط الله لا يوجهلو خير عم ينطوط حوالين السيارة متل الشمبانزي،
وكان عبد القادر قدروة مبسوط إي طبعاً بدهن ينبسطوا مو هالولد رح يخليهن قاعدين
وعم يمصوا بدمنا، لك إييييييييه كانت باطلة ومحولة هديك الليلة، قال شو رئيس شاب
ودارس بأوروبا، ياسلام شو دارس بأوروبا العما تقولوا متعلم بمدرسة هتلر للقتل
والتعذيب، لك ويا ريتو متل ربع هتلر علي الحلال كنا بلعناها وسكتنا بس ولد قال بدو
يقود مسيرة التطوير إي وشو تطوير، العما شو تطورنا، صرنا متل الهبلان ما بنعرف شي،
لا تلفزيون متل العالم والخلق ولا جرايد متل العالم والناس، جابوا كم واحد من
العصابة وخلوهن يفتحوا مواقع الكترونية قال شو بتنتقد الفساد، هههههه إي
وبعديـــــــــــن بينوا كلهن، بتعرفوا إيمته لما قال الشعب ما بقى بدنا، طلعوا
كلهن كلاب البيك، صاروا ينهشوا فينا، ويخونونا، بدكن نحكي بالأسماء إي شو عليها،
حدا سمعان بواحد اسمو نبيل صالح أو واحد تاني اسمو بسام القاضي، طبعاً في غير
هالنمرتين كتار، لك حدا جرب يقرا شو عم يكتبوا هالاتنين، شي مو طبيعي، نحنا كلنا
بنظرهن خونة، ليش؟ بتعرفوا ليش لأنو نحنا ما رضينا نكون كلاب البيك، وما رضينا
ننبح لما يأمرنا سيادتو، انبحوا ضد السعودية.. حاضر سيدي، انبحوا ضد قطر.. حاضر
سيدي، وهيك عم يعبي الدنيا صوت نباحهن، قلتلكن من الأول أنا رح احكي كل شي، وما
بقا بدي خلي ستر مغطى، بتعرفوا هاي النماذج عنجد هاي أخطر من عنصر المخابرات، لأنو
هداك كل الناس بتعرفوا، وبيديروا بالهن لما بيكون موجود، بس هدول متل الجرذان على
قولة القذافي، عنجد جرذان، ما بيحبوا يطلعوا ع الضو، بيحبوا الوساخة لأنها
بتناسبهن، وبيناسبن كتير واحد متل بشار رئيس عليهن، لانو متلن من نفس العينة، بس
نحنا والله ما عم تزبط معنا، هيك واحد بدو حبل مشنقة، واقف عم يضحك ومبسوط، لك
العما ضربك شو ما فيك دم… قديش صار بهالبلد دم، وأنت ما فيك ولا نقطة.

واحد سوري