بالسوري الفصيح

من أولها عمي أنا مو تبع مسلسلات، لا بتفرج ولا بخلي حدا ببيتي يتفرج ع المسلسلات، لا تاريخي ولا تركي ولا بيئة شامية ولا هالحكي الفاضي كلو، مو لأني رجعي ومتخلف، وما بعرف شو، بس أنا زلمة راسي بيوجعني بس شوف تنين عم يحكوا حكي ما لو طعمة، يعني كل رمضان بيصرعونا حكايات وقصص، فلانة اتجوزت وفلان اتطلق وأم عصام أبو عصام ومهند وجوز خالتو لمهند، أنا زلمة بحب السينما، روح قلبي بقعد وبتفرج على فيلم سينما ساعة.. ساعة ونص بيخلص، وخلصنا ضروري نقعد شهر عم نستنى شو بدو يعمل فلان وشو بدها تعمل فلانة، إي مو معقولة، بس بصراحة من كم يوم كنت قاعد عند الحلاق وكان حاطط ع الفضائية السورية، وكان في حلقة من هاد المسلسل بقعة زيت مدري بقعة ضوء، المهم طلع هادا الممثل الطويل تبع ضيعة ضايعة عم تمشي معو ممثلة ما بعرف شو اسمها، وكانوا عم يركضوا قال شو عم يعملوا خدعة لتبعين الحواجز، شي لبسوا طاقية متل تبع غيفارا، وقال شو هني يساريين، وقال ضحكوا على جماعة الحاجز، وخدعوهن بكم كلمة، قال لينين بيقول هيك، وما بعرف شو كمان، شي بيقرف الله وكيلكن هادا مو حكيي هادا حكي سعيد الحلاق، قال وبعد شوي نطوا قال شو ولبسوا لباس أفغاني، قال وضحكوا على جماعة اليمين قال شيخنا وحركات، وشي ما بتعرف شو بدهن يقولوا، المهم وبلا طولة سيرة قلتلو لسعيد الحلاق لك ديروا، لك أخي حاجة والله شي بيقرف، قام دار المحطة وإز أيمن زيدان واقف عم يحكي هو وابنو، قال والحارة مالها زعيم وما في عكيد، بس شو شوارب عاملين لأيمن زيدان، شي بيشهي شوارب غير شكل، شوي تاني سليم صبري كمان عامل شوارب مرتبين، قلتلو لسعيد الحلاق شايف هيك شوارب الحلاق مو متل حكايتك حالقهن ومتكل على الله، ضحكنا أنا وسعيد، عطيتو أجرة الحلاقة وطلعت تمشاية ع البيت وقفني حاجز، قللي وين هويتك، حبيت أعمل متل بقعة زيت قلتلو سيدي أنا من جماعة اليسار وأنا تبع جيفارا ولينين، قام زورني العسكري اللي ع الحاجز مترين بمترين الله وكيلكن وسلخني كف فتلني فتل، قللي هات هويتك ولا حيوان شو عم تخفف دم؟ طالعت هويتي اتطلع فيها من دون ما يحكي ولا كلمة، وقللي انقلع العما شو حمار، ودير بالك تخفف دم مرة تانية بحلل دمك ها، أمرك سيدي على راسي، سحبت حالي ومشيت منزل راسي وصلت ع البيت لقيت مرتي وبناتي قاعدين عم يتفرجوا على طبق رمضان ع الفضائية، دخلت ع الأوضة من تم ساكت وحطيت راسي ونمت ولهلأ أنا نايم، بس تخلص دراما رمضان فيقوني…. خخخخخخخخخخخ