صدى الشام موقع يهتم بما وراء الحدث
بلاد العرب أوطاني… إيه العماشو غنينا هالنشيد لما كنا
زغار، بتعرفوا شو اللي زكرني فيه، هادا يا سيدي من كم يوم، فتحت ع الفضائية
السورية ولقيتهن حاطين هالنشيد، بس ما عرفت شو المناسبة، وأحلى شي بعد ما خلص
النشيد، وانتعشت بتزكُّر الماضي لما كنا نوقف بالمدرسة بدرس الطلائع ونغني
والاستاز يأشر بالعصاية واللي بيشوفوا ما عم يغني يخبطوا على راسو، لحتى يزكروا
منيح إنو بلاد العرب أوطاني ولاااااااا.
المهم بعد ما خلص النشيد، طلع فاصل شعري، الله وكيلكن
وقف شعري وأنا عم أسمع هيام حموي عم تتغزل بدمشق، وكيف إنو هي خص نص رح توقف بوش
المؤامرة، ورح ترجع سوريا متل ما كانت أيام زمان، إي قول للزمان إرجع يا زمان،
وبعد ما خلصت هيام حموي، طلعت رائدة وقاف ومعها ضيفين شكلن تقال، عم يحكوا عن تخلف
البلاد العربية، الرجعية ها، رجعية مو حيالله، أنا هون تكركبت، بصراحة أنا بتكركب
بسرعة، لك شو القصة مو على أساس أوطاني، وما بعرف شو كمان، شو اللي صار يا شباب؟
تعدموني إزا عم زل عليكن، إنو كيف نحنا هالسوريين علمناهون كيف بيكتبوا ويقروا، لك
شوفوا شوي تاني كانوا رح يقولوا إنو نحنا علمناهن كيف بيمشوا بالشارع، وواحد من الضيوف
قال هدول أهل العكل، وضحك، قاموا التانيين ضحكوا، وشوي تاني كانوا رح يوزعوا ملبس،
هلأ أنا بحياتي ما رحت على بلاد العكل بس الشباب قالولي شي بيطير العقل، بيروح
الواحد على دبي كم يوم بيرجع مهستر، لك شو هاد؟ بيرحلوا يومين ع الدوحة بينسطل
الله وكيلكن، إي عن جد، لك شو عكل ما عكل، ما هدول صاروا بلاد ناطحات السحاب،
والتانيين رح يستضيفوا المونديال بعد كم سنة، لك حاجتكن عنفصة بقى، لسه ما فهمتوا
إنو عيب عليكن شوفة الحال، ترا هدول أهل العكل، هني اللي عم يتحكموا بكل شي عم
بيصير بسوريا، متل ما عم تقولوا إنتو، فشلون دخيلكن عم تتنقرفوا عليهن وموعاجبينكن
بنوب، بس ما تكونوا مفكرين إنو الزمن وقف عند ستنا زنوبيا، وإلا مفكرين إنو صحي
المواطن السوري مبسوط بصحن الفتة أكتر من الإماراتي اللي إزا إجا على بالو ياكل
فتة يحمل حالوا ويسافر على أحسن مطعم ياكل فتة ويرجع على بلدو قبل ما يكون أبو
عبدو الحمصاني حطلوا للمواطن السوري المتميز صحنو ع الطاولة، إي عنجد، وما تكونوا
مفكرين لأنو التلفزيون تبعنا تأسس قبل ما تتأسس دولهن متل ما قال واحد من الضيوف،
فهالشي معناتو إنو تلفزيونا متطور أكتر من تلفزيوناتهن؟ لا بالله عنجد هيك مفكرين،
لك حبيباتي ما عم تشوفوا الجزيرة والعربية والسكاي نيوز والمابعرف شو كمان، إي
العما عندهن وسائل إعلام بدنا فت خبز كتير لحتى نقدر نعمل متلهن، صحي هني فلوسهن
أكتر بس كمان هني ما بيسرقوا، وما بيجيبوا بنتها لماريا ديب لتصير مزيعة وابنها
مدير وبنت أختها ما بعرف شو، وابن عمتها وجوز خالتها، وشو كمان، بقا يرضى عليكن
إزا شايفين العرب كلهن يااااااااي، لشو لتحطوا بلاد العرب أوطاني، بلاها مو حلوة
صدقوني منشان سمعة المحل مومنشان شي، قال أوطاني قال، لك ليش إنتو خليتولنا وطن،
منشان تخلونا أوطاني؟ يقصف عمركن.
