بالسوري الفصيح

إي يا سيدي هادا الأسبوع الماضي قضيتو كلو قدام التلفزيون، صحي الكهربا بتيجي  وبتروح ومرات بتروح وما بتعود تيجي، بس شفتلي والله أعلم شي نص مليون لقاء وحوار واستطلاع وريبورتاج وتحقيق وما بعرف شو كمان، وكلها يا عين عمك عم تحكي عن الانتخابات، الله وكيلكن، شي بيشهي، طلع شعبنا حربوق وحريف ديمكراطية من يوم يومو، لك العما تقول راحوا درسوا شو لازم يحكوا، بتلاقي بياع خضرة عم يحكيلك عن التعددية السياسية، وبرامج الناخبين، وتلاقي ست ما بتعرف تقرا اسمها بتحكيلك ساعة عن صندوق الانتخاب اللي رح يبين للعالم كلو قديش نحنا شعب فهمان، وقدران يختار، لك ممثلين رقاصات شعارات، عفوا شاعرات، كلو عم يحكي عن الديمكراطية، إلا أنا تبلكمت هديك المرة وما عرفت احكي كلمتين ظراف، العما ضربني شو ناقصني لسان وإلا حصان؟ هلأ كلو كوم والمحللين كوم هدول بيشهوا الواحد كل يوم يعمل اننتخابات رئاسية، لك إي شو هاد، شي بيفلج عن جد مو مزح، فهمانين، كلام كبير ومهم، هادا بيحكي عن النقلة النوعية، وهادا بيحكي عن النقلة الحضارية، هلأ صحي كلن عم يحكوا عن نقلات بس حلوين وحياة جوز خالتي حلوين، وظراف كتير، معد محمد بيحكيلو كلمتين بيرد عليه طالب إبراهيم بيناولها لشريف شحادة، وكووووووووووول رونالدو، لأ عفواً ما تواخزوني بس قلبت التلفزيون بالغلط لشوف شو صار بنتيجة المباراة، وصدقوني أنا ما عم تابع الجزيرة الرياضية صحي هي غيرت اسمها وصارت بي إن سبورت بس على مين كاشفينكن عمي إنتو جزء من المؤامرة الكونية، لك حتى ريال مدريد مشارك معاكن، ما علينا، المهم بتطلع هاي الوزيرة الشماط بتحكي بتحكي وقديش هالديمقراطية رح تغير مفاهيم، وليكو ترا نحنا ما بنعرف مين رح يفوز بالانتخابات، والناخبين يعني حضراتنا نحنا اللي رح بنقرر مين رح يصير رئيس، بالله شو؟ عم تحكي جد وزيرة؟ شو صايرلك ما تكوني آخدة برد؟، نحنا بنقرر؟، إي روحي عنا عمي، وكووووووووووووووول كريستانو رونالدو.

واحد سوري