بالسوري الفصيح

كنا قاعدين أنا ورفقاتي بالقهوة، لك طقت روحنا وقلنا نروح نشربلنا نفسين أركيلة، لك العما لسه الولد مانزل الأراكيل وبلشنا نسحب، وبلشت الدخنة تعبق إلا ويا غافل إلك الله ما شفنالكن إلا هجموا علينا،… لأ لا يروح مخكن لبعيد لا مخابرات ولا غيرو، هجموا علينا جماعة التلفزيون، ومن بعيد كل اللي قاعدين بالقهوة ما لقوا غير طاولتنا، لك العما ومن بين رفقاتي ما نقوا غيري، مرحبا ممكن تحكيلنا شو رأيك بالانتخابات الرئاسية؟ العما ضربك، شو جابك لعندي؟ اتبلكمت وما بقا عرفان شو بدي احكي لك شو بدي قول، شو يعني انتخابات رئاسية، الله وكيلكن من فترة ما عم شوف الأخبار، وآخر شي شفتو كان أبو تفليقة وهو على كرسي متحرك رايح ينتخب حالو، ويوميتها ضحكنا كتير أنا ومرتي، بقا شو هالانتخابات اللي عم يسألوني عنها هدول، معقولة يكون الانتخابات اللبنانية؟ إي بيجوز شو بيعرفني، لأنو لبنان كتير مهمة بالنسبة لسوريا، وبيجوز هني مهتمين فيها، منشان عون الله لا يعينو، رجعت هالمراسلة سألتني، رح تشارك بالانتخابات؟ نكزني حدو ابن خالتي كان قاعد جنبي ومن دون ما فكر، قلتلها إي لكان طبعاً بدي شارك، الانتخابات منيحة، وإز شفتلكون هالمراسلة ابتسمت، وسألتني ولمين رح تعطي صوتك، العما، شو بيعرفني؟ رد حدو نكزني قمت قلتلها للمرشح اللي برنامجو بيكون أحسن، قام انبسطت هالمراسلة وقالت لي شكرا،ً ونطت هي والمصور تبعها على طاولة تانية وقبل ما يلفوا وجوهن كنا أنا ورفقاتي صرنا برات القهوة، إي يلعن أبو الأركيلة، أصلا ً الدخان بيضر بالصحة، وهاي بطلنا أركيلة كرمال الانتخابات.

واحد سوري