صدى الشام موقع يهتم بما وراء الحدث
يا مرتي يا حبيبتي قومي طفي هالتلفزيون الله يرضى عليكي والله طق مخي من كتر اللعي والحكي الفاضي.
لك ليش شو صاير معك؟ خلينا عم نتفرج؟
على شو بدنا نتفرج؟ مو شايفة شو عم يحكوا، من الصبح لهلأ وهني عم يعلكوا، وما سمعنا شي إلو طعمة، لك والله لو عم نتفرج على مسلسل تركي كان أحسن وأشرف
شو صاريرلك اليوم يا رجال؟
لك شو شو صايرلي، من الصبح لهلأ هلكونا ممانعة ومقاومة، وذكرى تأسيس الحزب اللي حقق أهداف الجماهير، وبطولات الحزب اللي قهر الاستبداد، وكيف القائد الخالد قدر يقود الحزب بمراحلو الحرجة ويوصل فيه لبر الأمان، وخلا الكلاب حاشاكي تردد الشعار قبل ما تنبح، لك مو كأنو ملينا من هالحكي الفاضي اللي مالو طعمة، لك هني ما تعبوا وهني عم يجيبوا نفس الناس لتحكي نفس الحكي من يوم اللي تأسس التلفزيون لهلأ، لك شو يعني استجاب لطموحات الجماهير، يلعن أبو هيك طموحات، خلت الرفاق يركبوا على كتافنا ويكذبوا ستين سنة، والله قرفنا.
لااااااا إنته وضعك صعب، طول بالك رح غير القناة، وحطها على قنوات المعارضة اللي بتحبها،
الله يوفقك بلاها
لك ليش يا رجال؟
نفس الشي الله وكيلك بس بالقلوب
شلون يعني؟
لأنهن رح يحكوا عكس اللي كنا عم نسمعوا رح يقولوا إنو حزب البعث سرق الدولة، وما بعرف شو، لحتى يكرهوا الناس بحزب البعث.
إي مو هادا اللي بدك إياه، والله حيرتني، شو بدك؟
خليها على الله يا بنت الحلال، ليش أنا أصلاً بعرف شو بدي، بتعرفي شو، حطينا ياه على شي مسلسل تركي، أو فيلم هندي، وخلصينا، بلا صمود بلا تصدي.
واحد سوري هو ومرتو
