بالسوري الفصيح

عملنا للولد طيارة ورق وقلنا يطلع يلعب بالشارع مع رفقاتو، ع القليلة يدفا شوي لأنو ما قدرنا نعبي مازوت لسه وكمان الكهربا ما عم تيجي بالمرة، بس ما كنا حاسبين طيارة الورق لح تفوتنا بمشكلة إلها أول ما إلها آخر. قال هو ورفقاتو شدوا الطيارات وطيروها وانبسطوا فيها، وما بعرف مين من رفقاتو حب يغني للطيارة وهي طايرة: طيري يا طيارة طيري وصاروا الولاد التانيين يغنوا معو … ولسه ما وصلوا لعند الورق والخيطان لحتى هجموا الشباب الطيبة، ومسكوا الولاد ومين علمكن هاي الاغنية. أنا كنت واقف عم اطلع من البلكون ولما شفت المنظر ركضت حافي لشوف شو عملوا الولاد، وصلت لعندن لقيت العناصر عم ينفخوا نار من أنوفهن، هدول ولادك؟

• لا معلم بس هادا ابني
• وليش عم يغنوا هيك؟
• شو عم يغنوا؟
• لا تجدبها
• والله ما عم اجدبها، بس أنا ما سمعتهن عم يغنوا لأني كنت واقف ع البلكون، شو كنتو عم تغنوا يا ولاد؟

طبعاً الولاد كانت وجوهن صفر بعد ما تصادرت طياراتهن، ومو عرفانين شو عم يصير حواليهن.

• ليش شو عم يغنوا معلم؟
• عم يغنوا طيري يا طيارة
• أي شو هاي الغنية ممنوعة؟ كلياتنا بنغنيها من لما كنا صغار؟ هاي أغنية للست فيروز
• كلكن بتغنوها لكان؟ أي والله لاخليكن تنسوا حليب امهاتكن.
• لك يا معلم الله يوفقك، بس قللي شو الغلط بالغنية؟ لا سياسية ولا اقتصادية ولا اجتماعية، ما فيها شي يا ابن الحلال
• اخراس، يعني ليش اليوم بالذات لحتى خطرلكن تغنوها؟ صارلكن عشر سنين عم تغنوا سميرة وأنا الحاصودة، هلأ صار بدكن تغنوا هيك أغاني مغرضة؟
• يا معلم الله يوفقك ويخليلك أولادك، والله ما بعرف شو قصدك، فهمني واذا كنت غلطان اعمل اللي بدك ياه.
• يعني لأنو رفاقنا الروس خسروا وحدة من طياراتهن بحربهن ضد الإرهاب صرتو كلكن تتمسخروا؟ شعب قليل أدب وما بيقدّر تضحيات الأصدقاء.
• يا معلم الله يسامحك، نحن ما بنقدّر، أصلاً نحنا ليل نهار عم نصلي الله يحفظ القائد بوتين، لولاه والله كانوا الإرهابيين بهدلونا، نحنا عم نغنيلها طيري، جكر بأردوغان، لأنو نحنا بنعرف إنو الرفيق بوتين بيقدر يغلبهن حتى بطيارات الورق، يا الله يا ولاد ع الدبكة لشوف: جاي تسنبل ورايا…

وقعدنا نحنا وهالعناصر ندبك لحتى دفينا، وكان قائد الدورية ماسك ع الاول ومبسوط… يا لطييييف شو كان مبسوط.