بالسوري الفَصيح

نحنا شعب ما في
أفصحن منو بالدنيا، بنفهم بكل شي دخيل ربنا شو بنفهم، كل ما بشوف واحد بيعطيني شي
عشر حلول للشي اللي عم بيصير، بطلع مع شوفير تكسي بكتشف أنو يخزي العين استاذ كبير
بالعلوم السياسية، ومفكر عظيم، بيشيل وبيحط وبيقرر، وبينفي وبيندد، وأحلى شي لما بيختمها بجملة اللي عم
يشتغلوا حمير مو فهمانين شي، بنزل من التاكسي بفوت لعند جارنا أبو جاسم بياع
الخضرا ما غيرو، شو جار كيفك، اهلا، شو الأخبار اليوم، العما وتقول فتحت قناة البي
بي سي، تصريحات وبيانات وأخبار عاجلة، لك يا عمي أنا عم أسألك عن أخبارك انت، شو
صار بمشكلتك مع شريكك بالمحل؟ الأخ صار بدو يحل قضايا الشرق الأوسط الجديد والقديم
وهو علقان من عشر سنين بمشكلة مع شريكو بالمحل ما كان يعرف يحلها، طيب إذا ما شاء
الله علينا ويخزي العين، عنا كل هالمفكرين وهالعباقرة، والسياسيين، وأصحاب الرأي، معقولة
لهلأ مو عرفانين نلاقي حل متل العالم والناس، ونقدر نتفق بينا وبين بعضنا أحسن ما
وصلنا لهالحالة؟ وبما إنو أبو جاسم وأبو حميد وشوفير التاكسي عندهم مجموعة مقترحات
مهمة جداً وحيوية، برأيي يعملوا اجتماع موسع ويسموه اجتماع سبينة واحد، وبعد
الاجتماع بيطالعوا بيان بيتفقوا فيه ع الحل النهائي للأزمة، لأنو هدا الشعب نفسو
اللي صار يقول عن الثورة أزمة، وهو نفسو طبعاً مو كلو نصو، بيصدق إنو اللي عم يصير
هو حرب أهلية مو حرب شوية عصابات ع الشعب المسكين، لك والأحلى إنو هدا الشعب نفسو
اللي بيسمع أخبار الفضائية السورية وبيصدقها… شباب زكاتكن الأمم المتحدة بدها
عشر خبراء نوويين حدا حابب يروح؟