صدى الشام موقع يهتم بما وراء الحدث
يا سيدي شعبنا آدمي وما بيحب الفاينة بنوب، لك العما فضحوها للوزيرة
لأنها حضنت القط سهيل الحسن، وتصورت معاه، يعني انتو شو دخلكن بالمخلوقة اتركوها
بحالها، هي حرة، تحضن القط تحضن الحمار تصطفل، يقطع عمرها وعمرو قشة لفة، بس صحي
هلأ أبو رقبة ليش شالها بعد ما نشرت الصورة؟ وبعدين شو هاي مرسوم جمهوري اعفاء
الدكتورة كندة الشماط من منصبها؟ مو عيب بشرفك يا ثيادة الرئيث؟ يعني المخلوقة
كانت حابة تغير طعمة، كوثر البشرواي حضنت البوط العسكري وباستو، وشو اسمو زهير عبد
الكريم انبطح ع الأرض وصار يبوس البوط، وسولافة فواخرجي ما بعرف شو عملت وراحت ع
الجبهة، ومع هيك جنابك ما انهزت كرامتك وطلعت مراسيم، استكترت على كندة الشماط
انها تحضن القط، لك هادا القط حبيبك تبع الانتصارات والبطولات، هو نفس اللي حرر
جسر الشغور، شو نسيتو للقط، وبعدين هاي مو كندة الشماط اللي بزماناتو واحد كتبلها
رسالة الدكتوراة وطلعت عليها سمعة بالجامعة انو هي مشترية شهادتها من واحد، ومع
هيك جبتوها وعملتوها بلجنة صياغة الدستور، وبعدين عملتوها وزيرة، وصارلها تلت سنين
عم تعمل اللي بدك اياه، يعني استكترت عليها انو حضنت القط، مرسوم يا زلمة معقولة،
ما كان لازم تقول لجمهور هالبهايم اللي ماشي وراك ليش عزلتها من منصبها؟ ما كان
لازم تشرحلهن السبب وتقول بالمرسوم لأنها ظهرت بمظاهر مخلة بالآداب العامة وما
بيصير وزيرة تعمل هيك تصرفات؟ ما كان المفروض انو هالناس يعرفوا ليش شلتوها من
منصبها؟ مع انو من اسبوعين بس كانت ع التلفزيون تبعك وكانت عم تحكي عنك حكي غير
شكل وقالت عنك انك أفهمن واحد بكل هالعالم.
المهم راحت من كيسها عالوزيرة…
بس بتعرفوا شو، لا تستعجلوا بكرا أو بعد بكرا بيجوز يساووها سفيرة، ابو
رقبة ما بيكب زبالتو حتى لو طلعت ريحتها لبرا… وكش برا وبعيد.
واحد سوري
