بالسوري الفَصيح

بدي فش خلقي واحكيلكن شو صار معي لما نزلت ع السوق
لحتى اشتري لبنتي فستان للعيد، صحي كل عام وانتو بخير ولو إجت متأخرة شوي. بنتي
الله يخليلكن ولادكن، صار عمرها سبع سنين، ولساتها بتنق على فستان العيد، لك قلت
لها يا بابا يا حبيبتي انتي صرتي كبيرة وما بيصير تبكي متل الولاد الزغار، ما كانت
تقبل، أخواتها الكبار اللي عمرهن عشر سنين و طنعش سنة بطلوا هالعادة من أربع سنين،
والحمد لله، صاروا يلبسوا تيابهن القديمة وهني فرحانين ومبسوطين، وبيروحوا ع
المراجيح، بيلعبوا لحتى يدوخوا… المهم نقت نقت يومين تلاتة، لحتى جبرتني أخدها ع
السوق، برمنا ع المحلات أنا وياها، بابا بدي هاد الفستان، بطلع ع السعر، وبيغط على
قلبي، بسحبها من إيدها وبقلها امشي بابا هادا مو حلو، ليكي في عليه لون أخضر، ومع
إنو ما بيكون عليه لا أخضر ولا شي، بس بنتي الله يخليلكن ولادكن ما بتحب الأخضر
بنوب، فتنا على محل كاتب ع الباب رخصة العيد، وهون بلشت أعصابي تغلي وارتفع ضغطي
وحسيت حالي لح انجلط، رقم عشرتلاف عادي، لك والمصيبة عجقة، لك منين الناس عم تجيب
مصاري؟ مو معقولة يكونوا كلهن حرامية، مو معقولة يكونوا كلهن مع النظام، مو معقولة
يكونوا كلهن شبيحة وعواينية. أسعار متل النار، وفي ناس عم تشتري بدل القطعة قطعتين
وتلاتة، الفاتورة خمسين ألف، تفضل، خمسة وسبعين ألف، تفضل، طيب أنا عم اشتغل متل
الحمار اجلكن وما عم اقدر ادفع أجار بيتي لأنو كيلو البندورة صار بهديك الحسبة،
طيب معقولة يكونوا هدول الناس ما عم ياكلوا ولا عم يشربوا، معقولة؟ طيب شو عم
يصير، شكلها سوريا بخير وأنا الوحيد اللي ماني بخير، شكلهن حلوها وأنا ماني عرفان،
سحبت البنت من ايدها وركضنا ركض ع البيت، قلت لها بابا حبيبتي انتي صرت كبيرة غصبن
عنك، بكرا بس تصغري بعود بشتريلك فستان للعيد، سكتت هزت راسها ولبست فستان أختها
اللي صار زغير عليها، وراحت مع أخواتها ع المراجيح، وأنا فتحت التلفزيون لأستنى
سيادتو وهو عم يصلي صلاة العيد…

واحد سوري