بالسوري الفصيح

تروح على بيت خالتك، متزكرين شو كانت تخوفنا هالكلمة؟ العمى عشنا سنين ونحنا خايفين من بيت خالتنا، وأحلى شي لما كانت أمو للواحد تقلو خود هدول الغراض وروح على بيت خالتك، كان البيت كلو يضحك، ويطلعوا ببعضهن، وتطلع النكتة التقليدية، شو ماما بدك تبعتيني على بيت خالتي، إي وهيك شي يعني. المهم بيت خالتنا كان أول سبب من أسباب الثورة، لأنو من خمسين سنة الناس رايحة جاية على بيت خالتها، يمكن ما ضل سوري ما راح شي مرة على بيت خالتو، لك العمى كان عنا بيوت خالات أكتر من البيوت اللي كنا ساكنين فيهن، قالت الناس كلها بصوت واحد بدنا المعتقلين، بس ما حدا رد عليهن بتعرفوا ليش لأنو المعتقلين اللي ببيت خالتهن عند النظام هدول رهائن مخليهن للوقت الصعب، يعني لما يتحاصر، رح يحط شروط، وإزا رفضوا شروطو رح يموت المعتقلين، هيك أنا بفهم القصة، وبصراحة أنا ما بدي احكي ع النظام لأنو ساقط بكل شي، وما عندو أخلاق ولا كرامة، بس اللي حارق قلبي هي بيوت الخالات الجداد اللي عملوها الشباب الطيبة اللي عاملين حالهن ثوار، لك العما، ما في فصيل ما عندو بيت خالة وبيهدد الناس فيه. من كام يوم بالغوطة، بدوما تحديداً، راحوا الشرطة واعتقلوا واحد من الناشطين، شب طالب طب كاتب على صفحتو ع الفيس بوك كم كلمة عم ينتقد فيها تصرفات بعض الفصائل اللي عم تشبح ع الناس، عنجد متل ما عم حاكيكن، راحوا شحطوه من بيتو وصادروا جهاز الكمبيوتر تبعو، وتحت التعزيب جبروه يعطيهن كلمة السر تبع الفيس بوك واعترف الزلمة إنو هو اللي كاتب البوستات، والتعليقات، وهو حالياً موقوف ببيت خالتو. عادي يعني صار في بيت خالة بدوما غير تبع النظام، حلو والله هادا إنجاز مهم، الله لا يعطيكن العافية. بس بتعرفوا أحلى شي إنو اللي اعتقلوا الشب طالعوا بيان للرأي العام وحطوه على صفحتهن ع الفيس بوك وقالوا فيه إنهن مع الحرية والثورة… هادا بيت خالة ثوري غير شكل بيطالع بيانات بيختلف كتير عن بيت خالة النظام اللي ما بيعترف، هلأ صحي في معتقلين ببيت خالة الثورة إلهن سنتين وتلاتة وما حدا بيعرف وينهن، بس هدوليك شغلة تانية أكيد.. وأكيد في كتير بيوت خالات ثورية بكل المناطق المحررة… حبيباتي لو سمحتوا ممكن تشرحولنا شلون فهمتوا الحرية؟