بالسوري الفَصيح

خير إن شاء الله من الصبح على طاخ وطيخ بس ما تكونوا مفكرين حالكن رايحين
تحاربوا يا شباب، وحدوا الله، شوية أوامر تكتيكية وتراجعوا، شغلة سهلة وما
بدها لبكة، لك ولشو اللبكة أصلاً إذا
كانوا هيك وإلا هيك رح يعتبروكن أبطال ويصرعوا راسنا بالأغاني الحماسية وعلى هادا
جيش الوطن، إي وعلى سيرة جيش الوطن، قال هادا يا سيدي لما الله كتب علي من غير
اليوم ورحت لأخدم جيش إجا فرزي والعياز بالله بالفرقة الرابعة، وبلشوا الشباب
يخوفوني أكلت هوا هاي فرقة المهمات الصعبة، هالحكي مو هلأ من شي عشر سنين، المهم
رحت على مقر الفرقة وهونيك استلمني واحد مساعد كرشو أكبر من كرش خال إمي الله
يرحمو اللي كان يعتبر الزلمة بلا كرش ما بيسوى قرش، أول ما شافني سألني ومن دون
مقدمات، إن تشو بتشتغل بالمدنية ولاك؟ تلبكت شوي، وخفت إي بشرفي خفت، يعني واحد
متل التور، ما بدو يخوفني وأنا قد السنفور متل ما كانوا قرايبي يقولوا، بلعت ريقي
وقريت المعوزات، وقلت لو بشتغل بالحريقة، ناولني طيارة ع الماشي، وكمل من دون ما
يوجعوا ضميرو مع إنو راسي صار يفتل فتل، قلت لي بالحريق؟ وشو بتحرق ولاك؟ لأ سيدي
ما بحرق أنا بياع قماش بمحل عمي. ضحك ضحكة مو طبيعية وانفرجت أساريرو، وسحبني ع
جنب وقللي بصوت واطي، رح أعطيك عنوان بيتي واليوم المسا بتمر لعتدي، لأنو مرتي
وبناتي عندهن عرس بعد شهر، وبدنا كم قطعة قماش، مر لعندي بعد السبعة، فهمت؟ فهمت
سيدي فهمت… بس مو لازم التحق بالخدمة؟

صار يضحك بكل ما الله عطاه، وقلي وهو يدفشني لبرات الفرقة، قلت لي تلتحق
بالخدمة مو هيك؟ يا حبيبي الوطن بحاجتك هونيك بالحريقة، أنت شو بدك تنفعني هون؟
روح حبيبي روح اعتبر حالك بإجازة، ولا تنسى الساعة سبعة عم استناك… لا تنسى جيب
معك شوية مساطر، يعني شي عشر خمسطعشر متر، شكلهن على زوقك، لا تتأخر ها.

حاضر سيدي

وهيك خدمتلكن هالوطن، خدمة غير شكل، ما ضل ولا ضابط بالفرقة ما لبست مرتو
فستان على حسابي، لأنو هادا جيش الوطن… يقصف عمركن انتو وهيك جيش.

واحد سوري