بالسوري الفَصيح

إي ماعلينا بيقولوا
داعش فاتت على تدمر، إي شو دخلنا نحنا، ليش شو جاب تدمر ع المهاجرين أصلاً تدمر
بعيدة بعيدة كتير…

هلأ بينطلي حدا ويقلي
بكرا بيوصلوا ع الشام، بالله شو، ليش رح يخلوهن أبطال الجيش العربي السوري؟ يا
حبيبي إنتو لسه ما شفتو رجال قواتنا المسلحة، صحي هني هلأ عم يعملوا انسحابات
تكتيكية بس لما بدهن رح يحولوا الأرض لنار. والله هيك كانوا عم يغنوا هداك النهار
على قناة الدنيا، لك إي وعلى سيرة الأغاني كنت عم اتفرج على سوريا دراما قلت لحالي
بعد شوي عن الأخبار، وإززز شفتلكن أوبريت شي مو طبيعي، مو تاركين مغني عندهن مو
حاطينوا، وعم يغنوا للشام، تلاتة من بيت القصير، وساحبين عصمت رشيد من مطعم القصر
سحب، وحسام تحسين بيك وما بعرف مين كمان، المهم خابصين الدنيا، وعم يغنوا ويرقصوا،
بس أحلى شي سلمى المصري، وفاديا خطاب، عاملين عمليات نفخ جديدة وراجعين شباب يخزي
العين، وعلى خود عواطف مشلخة يا شام البطولة، ويا سوريا التاريخ، وهالحركات
القديمة، وقام تنط سلمى المصري وتقول إنتي أنا يا شام والعالم كلو بيعرف نحنا
مين… قام نطيتلكن متل المصروع وقلت يا خرااااابي متل ما يقولوا المصريين، لك
الله لا يوفقكن، معقولة الشام أقدم عاصمة مأهولة بالسكان، صارت متل سلمى المصري؟
سلمى المصري يا عالم؟ شي مو طبيعي، يعني الشام كمان عاملة عمليات نفخ يا مدام؟ الشام
كمان مستعدة تبوس البوط العسكري اذا انطلب منها؟ لك عيب عليكن بهدلتوا كل شي، ما
خليتوا شي منيح، خلاص اتركوا الشام وانقلعوا، حلوا عنا، خلاص حاجتكن، والله
حاجة…ما بدكن تنقلعوا طيب خليكن قاعدين وبكرا كلكن تغنوا ع المشفى يا بو فهد..

واحد سوري