بالسوري الفَصيح

يا إمي شو هالبرد، وحياة جوز خالتي رح تتجمد عظامي، لك
ما عاد قدران اتحرك، مازوووووت ما في، كهربااااااااا ما في، غاااااااااز ما في،
عايشين بعل، تلج يا إمي تلج، ما في شي بالبيت، لا مواد أولية ولا شي، خلص نفضنا،
كل يوم بتجينا وحدة جديدة، شي زينة وشي هدى وشي سارا وشي نانسي ونحنا عم نتكتك،
جارتنا لافة حالها ببطانية وقاعدة هي وولادها قدام باب بيتهن، سألتها لك ليش قاعدة
برا يا أم محمد، قالت لي برا أحسن من جوا، هون الولاد بيشوفوا التلج وبينسوا البرد
شوي، بس جوا ما رح يشوفوا شي، يا حسرتي أصلاً ما بقيان عنا شي، برد إي والله برد،
الولاد بالمخيمات عم يموتوا من البرد، صورهن بتقطع القلب، يا حسرتي، كل شي صار
بيموتنا، لك نحنا شعب ما بقى لقيان نكشة، قال بزماناتو الديناصور انقرض بسبب
التلج، بس نحنا ما رح ننقرض، صحي نحنا عم نموت من أربع سنين بالبراميل والكيماوي
والصواريخ وبالذبح جيناكم، بس نحنا رغم هالشي شعب عنيد، ما رح ننقرض، شفتو جارتي
أم محمد، بكرا كلنا نعمل متلها نطلع نقعد برا، ليش نحنا أحسن من الناس اللي
بالمخيمات؟ لك دخيل الله برد، برد، رح تتجمد عظامي، بس ما رح انقرض.

واحد سوري بردان