بالسوري الفصيح

–حبيب شو صار بداعش؟

–والله ما بعرف، علمي علمك، بس والله أعلم لساتها باقية،
وتتمدد.

–طيب مو على أساس التحالف نازل خبط فيهن

–إي مزبوط، بس شكلو التحالف عم يضرب ضرب ما بيوجع، أو
بيجوز صواريخهن فاضية، يعني بيجوز عم يضربوهن بصواريخ سبانخ.

–سبانخ؟؟ سبانخ شو أنت التاني؟

–إي عنجد، مو شايفهن كل ما قصفوهن بيقووا، متل باباي من
هون بيجيهن الصاروخ من هون بيقول التحالف تقدموا، والله صرت عم اتمنى يبطلوا ضرب
فيهن بلكي يبطلوا تقدم، قال واحد أمريكي وازن ما حالو شي، قال إن هالدولة
الإسلامية صارت أمر واقع، وخايف حضرتو إنو يضطروا يتعاملو معها بالمستقبل.

–يا عيني، يعني كنا بمصيبة صرنا بمصيبتين.

–مصيبتين، قول عشرطعش ولا تخاف، داعش، ونظام، وتحالف،
وحالش، وما بعرف شو كمان، ولسه طلعولي جماعة الحوثي كمان.

–ووووووووووين شو جاب الحوثي لهون، هدول باليمن، شودخلهن
فينا؟

–بالله شو؟ مو نحنا صرنا ملطشة، كل واحد فاضي شغل بيبعت
ناس لعنا شي بيجاهدوا، وشي بيقاتلوا في سبيل المراقد، وشي ما بعرف شو كمان.

–هلأ بهاي معاك حق، لك العما تقول ما في بالعالم غيرنا،
كلو نازل ضرب فينا.. بس دخلك شو هالحل؟

–طووووووووووووووط

–شو هي طووووووووووط ما فهمت شي؟

–بلاها أحسن، لأنو كلمة ما بنتحكى، وممنوع تطلع ع
التلفزيون، كبيرة كتييييييييييير

–إي طووووووووووووووووووط لكان

(واحد
سوري+واحد سوري)