بالسوري الفصيح

اليوم في عنا انتخابات إنتو أكبر قدر تلاتة مرشحين حالهن
وواحد بس رح ينجح، يا حزركن مين؟ ههههه لا حدا يضحك علي أنا بعرف مين رح ينجح، وكل
العالم بيعرفوه بس حبيت خفف دم شوي، يعني بعد كل هالقهر والمصايب الواحد يضحكلو شي
ضحكة ع البيعة ما بيصير شي، بس والله وبكسر الهاء شي ما بيضحك، والله شي بيبكي،
يعني لما بتسمع بالأخبار إنو أكثر من ربع مليون سوري ماتوا، وشي تلت ملايين
تهجروا، بيصير بدك تنط من شي بناية وتموت حالك، لك معقولة هدول ما عندهن ولا نتفة
أخلاق لحتى يعملوا انتخابات، ويحطوا صور بالشوارع وقال شو سوا، سوا تخلع نيعكن
انته وياه وياها، لك شو سوا ما سوا؟ ما ضل شي ولا شي، بتنزل ع السوق لتشتري كيلو
بطاطا، بيطلعلك معو نص كيلو سوا، بلا سوا بلا أكل هوا، ما في شي ماشي، ولا في شي
واقف أصلاً، هربنا لبرا ما ارتحنا رجعنا لجوا ما ارتحنا، وحضرتو رافع راسو لفوق
وعم يعلك، الله وكيلكن علاك وحكي فاضي، ولا كلمة بتفهم من حكيو لك ومع هيك بتلاقي
في شي خمسين واحد عم يحللو، لك شو عم تحكوا، شو عم تساووا فينا، خلص لك عمي خلص،
قولوا إنو هاي البلد إلكن، ونحنا لح نهز روسنا ونصدق بس تيجوا تضحكوا علينا عيني
عينك وتقولوا انتخابات وديمقراطية، ترا يعني صحي نحنا شعب حباب بس مو حمير، نحنا
بنعرف شو بيصير حوالينا وفهمانين كل شي، الله وكيلكن كل شي، فبقا برضايي عليكن
بلاها هالانتخابات وخدوه لصاحبكن اعملولو عراضة مطنطنة، وخدوه على مجلس الشعب تبع أبوه خليه يحكيلكن حكاية قبل
النوم، وبعدين وصلوه على بيت أبوه وخلي أخوه يرجع يهدد ويضرب عادي أصلاً إزا ما
عملوا هيك بيكونوا ولاد حرام، لأنو المتل بيقول مين شابه أبوه ما ظلم وهدول أبوهن
كان هيك كمان إي ليش الكزب والحكي الفاضي والشعارات اللي بلا طعمة، قولوا نحنا
بنملك سوريا، لك يا عمي وإزا بدكن غيروا اسمها، واعملوا نظام ملكي كمان شو عليه،
ما في مانع، بس ترا ديروا بالكن نحنا صحي شعب حباب، بس ترا ما رح نتعب، بتتزكوا شو
عملتو فينا من تلت سنين لهلأ، شفتوا قديش خسرنا بس إنتو كمان خسرتوا، إنتو كمان ما
بقى في عندكن شي، إلا ثيادتو، إي روحوا انقعوه واشربوا ميتو، بس نحنا مكملين، وما
رح نتعب عرفتوا شلون. ما رح نتعب.

واحد سوري