بالسوري الفصيح

صدى الشام/

ما بدي اكذب عليكن وقول إني ما انبسطت لأنو ترامب قال عن أبو رقبة إنو حيوان، أنيمال يعني، وما بدي اكذب عليكن إذا قلتلكن إني ما شفت مقطع الفيديو شي خمسين مرة، وشفت كل شي طلع تقفيل بهالكم يوم، بس بكذب عليكن إذا قلتلكن إني اعتبرت كلامو مهم، أو إنو شفا غليلي، يعني إي ويقعد من الصبح للمسا يقلو حيوان دخلكن شو الفايدة؟ عنجد عم اسأل يعني نحنا شو بنستفيد، لأنو ممكن يقلو حيوان عادي، وبعد كم يوم بنقرا شي خبر بيقول إنو في تعاون بين المخابرات الأميركية ومخابرات الحيوان، إنو عادي بتصير يعني، ويمكن شي شركة من الشركات اللي بيملكها ابن خال الحيوان بتعمل عقد مع شي شركة من الشركات اللي بيملكها ترامب، والله عادي بتصير يعني لا تستغربوا، ولا تفكروا إنو بكرا الصبح أو بعد بكرا بالكتير ممكن تلاقوا الحيوان- أجلكن الله- حامل شنتايتو وطالع من باب القصر تبعو.. لا مو هيك رح يصير، لأنو ترامب مانو حباب، ولانو أبو ايفانكا الأمريكي ولا أي شي من هالشغلات. ترامب هو رئيس أمريكا، وانتو كلكن بتعرفوا شو يعني أمريكا، وأكيد بتعرفوا شو عملت بالعراق وأفغانستان واليابان وفيتنام، وشو كمان؟ فيكن تحسبوا شو علمتوا أمريكا للصبح، وما رح تخلصوا. يعني بحياتنا ما سمعنا إنو هالأمريكان الحبابين عملوا شغلة منيحة لحدا، مو لأنهن أشرار أو شي تاني، لأ، بس لأنو هني بيفكروا بمصلحتهن، ووين ما بتكون مصلحتهن بيكونوا، دخلكن نحن شو فينا نعمل لأمريكا مثلاً؟ لك إذا مو قدرانين نتخلص من الزعران اللي ركبوا على ظهورنا باسم الثورة، ومو قدرانين نوقف الحرامية اللي عم يسرقوا مصاري على حساب الثورة، لك نحنا ما عم نعرف نعمل شي غير نقعد وننوح ونقول يا عالم تعالوا ساعدونا، ونحنا بنعرف إنو العالم شايفنا من ست سنين ومو فارقة معو، بيسهروا وبيشربوا وبينبسطوا وبعدين بيطالعوا بيان بيقولوا فيه إنو أبو رقبة مجرم، يا سيدي وحيوان، ولا حدا يزعل، أي شو بعدين؟ ولا شي. دخلكن ضربة مطار الشعيرات شو بتفرق عن ضرب قيادة الحرس الجمهوري أو الفرقة الرابعة، بتفرق كتير مو هيك، مبلى… طيب ليش ما ضربوا الفرقة الرابعة… لا تقولولي منشان مجزرة خان شيخون لأنو اللي قتل الناس وهني بملجأ العامرية ما كتير رح تفرق معو.. بس أكيد أنتو كلكن بتعرفوا ليش.