بالسوري الفصيح

صدى الشام/

بيقول المثل كول متل ما بتحب والبيس متل ما بيحبوا الناس، هلأ هادا مثل قديم كتييييير، وما بقا يمشي هالأيام، يعني ما بقا حدا يلبس متل ما بيحبوا الناس، في ناس بتلبس اللي بيكرهوه الناس، وبيعملوا وشم، وبيحطوا شغلات هيك وهيك وبتحسهن عاملين هالشي منشان يزعجوا الناس، بس هني أحرار شو دخلنا، ما دام هو بحالو وأنا بحالي شو دخلني، يصطفل، بس في بعض الناس بيطبقوا المثل مية بالمية، يعني بتلاقيهن قاعدين بمطاعم خمس نجوم، وعم ياكلوا ما لذ وطاب، وساكنين بأحلى أوتيلات، وما بيتحركوا إلا بتكاسي. حياة غير شكل، وبيحملوا موبايلات حديثة جداً جداً شي فوق الريح، بس لما بيصير اجتماع للمعارضة بتلاقيهن جايين عم يحكوا باسم الناس المساكين المعترين اللي مو ملاقين عشا يومهن، وما في عندهن لا بيت ولا شي. في منهن بالمخيمات، وفي منهم عايشين كل تلت عيل ببيت، بلبنان أو بتركيا أو بالأردن، وفي منهم تركوا شغلهن وصاروا يشتغلوا شغل ما بيناسبهن، بس هني ما بيقبلوا تنذل كرامتهن، بس هدول قصدي هدوليك تبع الموبايلات والاوتيلات، بيحكوا باسم هدول الناس، والله عنجد متل ما عم حاكيكن، وأكيد انتو بتعرفوا هالشي أكتر مني، قليلة شو طلعت عليهن فضايح وشو سمعت عنهن الناس حكايات وقصص، ومع هيك ما بيستحوا، بياكلوا منسف مرتب، وبيطلعوا يحكولك عن المعاناة، لك معاناة شو لك حبيب، مو شايف كرشك صاير مترين.

بزماناتو حكينا مع واحد من هالمعارضين القبضايات منشان يساعد عيلة كان بدهن يعملوا عملية لابنهن اللي وقعت عليه بلوكة لما وقع بيتهن بالقصف على إدلب، الولد متل الوردة رجلو الشمال كان ممكن تنقطع إذا ما انعملت العملية بسرعة، بتعرفوا شو قال المعارض البطل، قال:” والله ما معي أنا ساكن بالإيجار”!. ولك قول غيرها يا ابن الحلال معقولة من بلد لبلد، وعم تجتمع مع وزراء وسفراء واضرب واطرح، وما معك تساعد هالجماعة بألف دولار.

بلا طولة سيرة الزلمة قطع إيدو وصار يشحد عليها، ولولا شوي ها، كنا رح نعملوا جمعية ونعطي اياها أول واحد.

الولد مشي حالو الحمد لله لأنو في زلمة سوري محترم عايش بالخليج تكفل بعلاجو ومن دون ما حدا يعرف شو اسمو، والمعارض الفقير لساتو لهلأ ما عم يلاقي أجرة بيتو، ومن كم يوم كان عم يحكي عن مأساة الشعب السوري… بتعرف أنتو مأساة الشعب السوري، لأنو لو تركتونا لوحدنا كان عرفنا نسقط النظام من زمان، بس الظاهر لازم نسقطكن قبل ما نسقط النظام.