بالسوري الفَصيح

يا جماعة اوعا حدا
يفكر اني بكره الروس، أو لا قدر الله ما بحبهن، لا بالعكس الروس كويسين وحبابين،
وما عملوا شي بحياتهن مو كويس، معليش بدكن تسامحوني هي هيه الحقيقة وإزا حدا عندو
غير حكي يشرف يجي ع الشام ويقول نص كلمة ع الروس ويشوف شو بيصير فيه. لك العما،
الجماعة نسيوا أبو زميرة وجماعتو، وهلأ ما عندهن شغلة ولا عملة غير يحكوا عن
بطولات الروس. واحد معنا بالشغل كان عم يحكي من يومين شي بيشبه غرندايزر الله
وكيلكن، قال وقام هالجندي الروسي حمل المدفع على ظهرو، وصار يركض، وقف على راس
التلة وقصف وهو حاطط المدفع على ظهرو، قصف هالجيش الألماني وإلا ماتوا شي الف واحد
من جماعة ميركل، هلأ صحي هو خربط بين ميركل وهتلر، بس بصراحة كل اللي كانوا قاعدين
بالمكتب كانوا مصدقين، وواحد قالوا إنو بيعرف القصة، وحلف مليون يمين إنو قراها
بكتاب الحطب والسلام تبع بولنستوي هلأ أنا ما سألتو مين هادا بولنستوي، منشان ما
يقول عني أجدب وما بعرف، بس حبيت اتفصحن وقلت لو بس مو كأنو تخينة شوي إنو يشيل
مدفع، يا زلمة يعني هاون ماشي الحال، بس مدفع والله تقيلة. ولسه ما كملت كلامي
لحتى هجموا علي الرفاق اتهامات وتخوين وشوي تانية لح يضربوني الله وكيلكن، إنو شو
قصدك، يعني الجيش الروسي مو بطل؟ يعني نحنا عم نألف قصص، لك لا والله يا شباب
الجيش الروسي أبطل الأبطال، ومافي أبطل منو بالعالم، بس والله المدفع تقيل، قام
واحد من الرفاق جعر جعرة هزتني، وقاللي وهو عم يزورني: إي شو مفكرو خروق، هدول جيش
بوتين، ولك انت ما بتعرف مين بوتين، هون حسيت بأني على بواب الشحطة ع الفرع قمت
رفعت راسي لفوق، وعدلت قبة قميصي، وقلت لو غلطان، أنا اللي بعرف الرئيس بوتين أنا
اللي بعرفو، وبعرف إنو بالحرب العالمية التانية نط من الطيارة ومسك واحد ألماني
كان هربان، واعتقلو، وقبل ما يقولوا ولا كلمة صرت غني أغنية الكاتيوشا…

واحد سوري