بالسوري الفَصيح

وهيك طار حافظ من
الألف ليرة، ناموا الناس فاقوا تاني يوم، ما لقوا حافظ، لك وينك يا حافظ؟ وين رايح
وتاركنا؟ هلأ اللي بيقرا شو عم يكتبوا الناس عن جد بيطقوا خواصرو من الضحك، العما
طار عقلهن كيف بيطير حافظ، لك هادا ابو باسل وينو روحتوه، وشو هاي حاطيلنا مدرج
بصرى؟ وشو لح نستفيد من هالمدرج اللي مسيطرين عليه جماعة المعارضة هلأ؟ لك هادا
أبو باسل باني سوريا الحديثة، كيف تجرأتو تشيلو صورتو؟ كيف؟

عنجد ما عم زل
عليكن، هيك كاتبين، وكمان قرروا الجماعة يعملوا حملة لمقاطعة الألف ليرة الجديدة،
هلأ هني لا لح يقاطعوها ولا شي، بس حكي، وعلاك، يعني بكرا آخر الشهر لما يجوا
ليقبضوا رواتبهن بيمسكوا المصاري بسنانهن مو بدياتهن، لأنو حارتنا ديقة كتيييييير،
ومنعرف بعضنا منيييييييييح، لك انتو بتبيعوا البلد بحفنة دولارات، فحاجتكن كزب
ولفوها، بعدين تعا لهون انته وياه وياها،

مو شايفين حواليكن
شو صار بالبلد، مو شايفين شو عمل ابنو لباني سوريا الحديثة، عن جد انتو سوريين
متلكن متلنا؟ عن جد نحنا وياكن من بلد واحد؟ لك كل هالخراب اللي صار ما همكن، لك
ما ضل بسوريا حجر على حجر، لك ما ضل ناس بسوريا، وانتو كل اللي هاممكن صورة حافظ!
صورة حافظ، يا ولاد… أعوز بالله منك يا لساني، اللهم إني صائم، وعلى سيرة الصيام
وبما إنكن ولاد بلدنا، بتعرفوا كم عيلة سورية ما عندها أكل برمضان؟ بتعرفوا كم
عيلة سورية صارلها سنين ما بتعرف شكل الألف ليرة؟ انتو زعلانين على صورة معلمكن
ومو زعلانين على بلد كامل خربوا ابن معلمكن دمر كل شي فيه بس منشان يضل قاعد ع
الكرسي اللي ورثلو إياه أبوه، اللي من أربع سنين الناس عم تلعن روحو، بتعرفوا ليش
السوريين عم يلعنوا روحو لحافظ تبعكن لأنو هوي اللي خرب سوريا، وهوي اللي جوع
الناس بسوريا، وهو اللي خلا الألف ليرة حلم للناس بسوريا، زعلانين ع الصورة؟ لك
الله يلعنكن انتو والصورة… واللهم إني صائم.

واحد سوري