بالسوري الفصيح

كيفك؟

منيح، طبعاً منيح، وليش لحتى ما كون منيح، الحمد لله،
الأمور فوق الريح، وما في شي ناقصني، عم فيق وآكل ونام متل الدواب، لا هم ولا غم،
ولا هاممني أي شي بالدنيي، مسطل وماشي، مااااااااااع، راسي فاضي، وجيبتي فاضية، بس
منيح، مرتاح، غير شكل، بفيق وباكل وبنام يا سلام، شغل ما في، طلعة من البيت ما في،
لأنو في حواجز، وتلفزيون ما في كمان لأنو بعتو من كم يوم منشان أدفع آجار البيت، حماتي بالمستشفى صارلها شهر وما عم اقدر روح
شوفها لأنو مو حلوة روح وإيدي فاضية، يعني بالقليلة علبة شوكلاطة، بس منين تعدموني
إذا في بجيبتي ميتين ليرة، بطلت الدخان، وما عاد قربت ع الأركيلة، لأنهن بيضروا
بالصحة، وكمان بطلنا نشرب شاي وقهوة لأنو وزير الصحة الله يكتر خيرو قال إنهن
بيسودوا السنان، إي ومو ناقصنا يسودوا سناننا كمان، الولاد لما سمعوا هالحكي
اقتنعوا ومرتي بتعرف إنو وزير الصحة ما حكى هالحكي، بس هززت راسها وقالت مزبوط،
مزبوط يا عمي الأكل مو منيح للأمعاء الغليظة بتتعب بسرعة لهيك لازم الواحد يخفف
أكل قد ما بيقدر، ولشو لحتى ناكل لحمة أصلاً اللحمة مو منيحة عنجد مو منيحة، بعدين
شو ما فينا إنسانية قاعدين عم ندبح بهالخواريف والبقر، حرام خليهن عايشين، كان في
دكتورة ع الفضائية السورية الله يكتر خيرها قالت إنو النباتيين صحتهن بالعادة أحسن
من الحيوانيين، قصدي اللي بياكلوا لحمة، وبعدين بيصيروا إنسانيين أكتر، يعني
بيحسوا والله فكرة كويسة بدنا نقترح هيك موضوع ع الجماعة بلكي يصيروا يحسوا شي
شوي، لك يا أخي صيروا نباتيين، بلاها اللحمة، كلوا خس، كلوا خيار، كلوا فجل بصل،
بس بلاها اللحمة مو منيحة بتضر يا عمي، أنا خايف عليكن منشان ما تفطسوا بكير، إنتو
لازم تعيشوا لأنو الوطن بحاجتكن، الوطن عنجد بحاجتكن، يعني لو ما إنتو موجودين كان
تبهدل هالوطن، والله كان صار ملطشة وكان صار مين ما بدو يتدخل بشؤونا الداخلية، بس
لأنو إنتو موجودين نحنا كلنا بخير، سوريا بخير، فالله يرضى عليكن بطلوا أكل لحمة،
عم قلكن مو منيحة أبداً، أبداً، وبدي اقترح عليكن اقتراح ممتاز شو رأيكن توزعوا
اللحمة ع الفقراء، هدول خليهن يموتوا بكير مو مهم، خليهن ياكلوا لحمة ويبطلوا
إنسانية المهم إنسانيتكن إنتو، خدوا كل اللحمة اللي ببراداتكن وعطوهن ياها، وهيك
بتكون ضربتو عصفورين بحجر واحد، منو بتكونوا خلصتوا من اللحمة ومنو بتكونوا خلصتوا
من الفقراء ونقهن، لأنو الفقراء بينقوا كتير، بدنا كزا وبدنا كزا، ومنشان تضمنوا
إنهن ياخدوا اللحمة من تم ساكت خلوا الفضائية وسما والإخبارية يطالعوا برامج تحكي
عن فوائد اللحمة، بس إنتو لا تشوفوها، خلي الفقراء يشوفوا هالبرامج، وياخدوا
اللحمة وياكلوها وينبسطوا خرجن الله لا يقيمن، قال فقراء قال، نحنا بلدنا لازم
تكون بلد نباتية مليانة إحساس، وإنسانية، بس الله يخليكن بلا ما تعلموا مؤتمرات
خطابية منشان هالموضوع، لأنو ساعتها رح تضحكوا علينا العالم، ونحنا العالم ما
بيقدر يتدخل بشؤوننا الداخلية لأنو سيادتنا الوطنية غير شكل، نحنا ولا حدا بيقدر
يتدخل، ولا حدا، شو ما كان، ومين ما كان، نحن محافظين على القرار الوطني، وعنا
مسؤولين قبضايات بيروحوا وبيجوا وين ما بدهن وبيقدروا يعلموا العالم أصول الحرية
والديمقراطية، لأنو نحنا شعب فلتة، وبتعرفوا شو خلي هاي معارضة الفنادق تاكل لحمة
خليهم يعبوا بطونهن لحمة بلكي بيموتوا بكير كمان، ونخلص منهن ومن مؤامراتهن على
السيادة الوطنية، نحنا ما بناقش أبداً بسيادتنا الوطنية، هي خط أحمر، لهيك أعزائي
المسؤولين الكرام، كلكن كلكن من الكبير للصغير للمقمط بالسرير بطلوا أكل لحمة
أحسن، بطلوا تماماً، وكلوا هوا…

واحد سوري… جوعان