الآن
الرئيسية / منوعات / ميديا / فضائيات / بالسوري الفصيح

بالسوري الفصيح

شفتوا لما طلعوا الناس بالباصات الخضر من الوعر؟ شفتوهن؟ اطلعتوا بوجوههن، سمعتوا أصواتهن؟ حسيتوا بإحساسهن؟ بتعرفوا هاي الباصات أسوأ شي عملتو البشرية بالخمسين سنة الماضية، أسوأ من بيت الأسد، وأسوأ من حسن زميرة. هاي الباصات هي اللي ما رح تروح من زاكرتنا بسهولة، لأنو هاي الباصات الخضر من أول يوم بالثورة كانت شؤم علينا كلنا. أول شي كانت كل يوم جمعة بتنملا شبيحة منشان يروحوا يقمعوا المظاهرات ويضربوا الناس، كانوا يوقفوا قدام ملعب العباسيين وبيستنوا لحتى تخلص صلاة الجمعة وبعدين بيروحوا شي على جوبر وشي ع زملكا وشي ع دوما، وبيضلوا هيك عم يضربوا الناس للمسا، بعدين صاروا يعبوها معتقلين ويصيروا يدعوسوا عليهن، شباب متل الورود كانوا يعتقلوهن من الشوارع ويحشروهن بالباصات، ويخلوهن يهتفوا لمقصوف الرقبة، وأكيد كلكن شفتوا هالمنظر…

ضل الشعب عشرين سنة كرهان حياتو من أزمة المواصلات، ولما جابوا الباصات حولوها لمعتقلات. بعدين متل ما شفتوا صاروا يفضوا فيها المناطق، أول شي بحمص القديمة، وهلأ بالوعر… وبعدين ما منعرف وين. عم يعملوا تقسيم للشعب، ويفرغوا البلد منشان ييجوا الإيرانيين ويحتلوها متل مو مخططين، بس ما لح تزبط معهن، أنا بعرف إنو ما لح تزبط معهن، لأنو نحنا شعب راسوا يابس… ولح ننتصر بالأخر.

أهل حمص راحوا على إدلب، وأهل إدلب استقبلوهن بالأهلا وسهلا… بكرا بس يرجعوا ع بيوتهن بيقولوا والله كنا زايرين عند أهلنا بإدلب… هيك العادة، بس ابن حافظ ما لح يلاقي حدا يستقبلو، لح ينطرد برا، مو نحنا اللي هتفنا سوريا حرة حرة بشار يطلع برة…

بتعرفوا، شو كنت متمني من الجماعة اللي اجتمعوا بالرياض يقولوا إنو مستقبل سوريا لح يكون من دون الأسد ومن دون باصات خضر… والله أنا بكره الباصات الخضر.

واحد سوري

شاهد أيضاً

“أرشفة الحرب”.. صراع بين الأسد والمعارضة على ذاكرة السوريين

صدى الشام – ديما شلار تستمر الحرب بين المعارضة من جهة، والنظام وحلفائه من جهةٍ …

أرشيف فيلم “إلى سما” يتّجه للتحوّل إلى أدلّة على جرائم النظام في سوريا

صدى الشام – ديما شلّار يسعى فريق الفيلم الوثائقي “إلى سما” لتقديم المقاطع المصورة، وأرشيف …

الرئيسية / منوعات / ميديا / فضائيات / بالسوري الفصيح

بالسوري الفصيح

إنو كيف الواحد بيعرف إنو هو سوري؟ لأ مو اللي عندو جنسية سورية، ولا اللي بيدافع عن أبو رقبة طويلة، ولا اللي أجداد أجدادو سوريين، بتعرف إنك سوري لما بتفتح ع الفضائية السورية وبتشوف إعلان “حافظ على نظافة مدينتك” عرفتوا كيف، يعني صحي مدينتك كلها راحت بالباي باي وما بقى فيها حجر على حجر، وصحي شوارعها صارت كهوف، وبيوتها صارت تراب، بس ما دخل، كل شي لوحدو، لازم تقرا هالإعلان الخالد، اللي موجود من أيام الرئيس الخالد ما غيرو. وعلى سيرة الرئيس الخالد، بزماناتو صاحبنا أبو حسن اشترى سيارة سكودا بيك أب، وحطها قدام باب البيت وكان طاير عقلو فيها، تاني يوم الصبح طلع لقاهن حاطين ع السيارة إعلان لبرادات الحافظ، قال شو الحافظ أربعون عاماً نزداد شباباً، الزلمة تكركب وما بقى عرفان شو يساووي، يعني هو مو ناقصو، معقولة يشيل الإعلان تبع الرئيس الخالد؟ معقولة والله بيشيلوا راسو إذا شال الإعلان. طيب شو بيعمل، الإعلان ع البلور الأمامي يعني بوش الشوفير، وهيك ما رح يقدر يسوق ويمكن يعمل حادث، فكر وفكرنا معو، بالأخير وصلنا لفكرة عبقرية إنو ياخد السيارة ع المغسلة وهونيك أكيد الإعلان رح يروح لما ينزل عليه المي، مع إنو السيارة لساتها ع الزيرو، بس معليش المهم نخلص من الإعلان، حمل حالو وراح ع المغسلة، غسيل وتنظيف وغيار زيت وكل شي، حط الزلمة هديك الحسبة، ولما طلعت السيارة لقى الإعلان لساتو بمطرحو، سأل صاحب المغسلة يا معلم ليش ما شلت الإعلان؟ رد الزلمة وهو عم يتلفت يمين وشمال، شو أستاذ، شو شايفني مستغني عن حياتي، روح الله يسترك، قال شيل الإعلان قال. وضل أبو حسن أكتر من شهر صافف السيارة قدام باب البيت وما بيركبها، لحتى إجا ابن حماه جايبلو البشارة أخيراً… أربعون عاماً نزداد شباباً هاي ماركة برادات، مو ماركة سيادتو..

 

واجد سوري

شاهد أيضاً

“أرشفة الحرب”.. صراع بين الأسد والمعارضة على ذاكرة السوريين

صدى الشام – ديما شلار تستمر الحرب بين المعارضة من جهة، والنظام وحلفائه من جهةٍ …

أرشيف فيلم “إلى سما” يتّجه للتحوّل إلى أدلّة على جرائم النظام في سوريا

صدى الشام – ديما شلّار يسعى فريق الفيلم الوثائقي “إلى سما” لتقديم المقاطع المصورة، وأرشيف …

الرئيسية / منوعات / ميديا / فضائيات / بالسوري الفصيح

بالسوري الفصيح

عملنا للولد طيارة ورق وقلنا يطلع يلعب بالشارع مع رفقاتو، ع القليلة يدفا شوي لأنو ما قدرنا نعبي مازوت لسه وكمان الكهربا ما عم تيجي بالمرة، بس ما كنا حاسبين طيارة الورق لح تفوتنا بمشكلة إلها أول ما إلها آخر. قال هو ورفقاتو شدوا الطيارات وطيروها وانبسطوا فيها، وما بعرف مين من رفقاتو حب يغني للطيارة وهي طايرة: طيري يا طيارة طيري وصاروا الولاد التانيين يغنوا معو … ولسه ما وصلوا لعند الورق والخيطان لحتى هجموا الشباب الطيبة، ومسكوا الولاد ومين علمكن هاي الاغنية. أنا كنت واقف عم اطلع من البلكون ولما شفت المنظر ركضت حافي لشوف شو عملوا الولاد، وصلت لعندن لقيت العناصر عم ينفخوا نار من أنوفهن، هدول ولادك؟

  • لا معلم بس هادا ابني
  • وليش عم يغنوا هيك؟
  • شو عم يغنوا؟
  • لا تجدبها
  • والله ما عم اجدبها، بس أنا ما سمعتهن عم يغنوا لأني كنت واقف ع البلكون، شو كنتو عم تغنوا يا ولاد؟

طبعاً الولاد كانت وجوهن صفر بعد ما تصادرت طياراتهن، ومو عرفانين شو عم يصير حواليهن.

  • ليش شو عم يغنوا معلم؟
  • عم يغنوا طيري يا طيارة
  • أي شو هاي الغنية ممنوعة؟ كلياتنا بنغنيها من لما كنا صغار؟ هاي أغنية للست فيروز
  • كلكن بتغنوها لكان؟ أي والله لاخليكن تنسوا حليب امهاتكن.
  • لك يا معلم الله يوفقك، بس قللي شو الغلط بالغنية؟ لا سياسية ولا اقتصادية ولا اجتماعية، ما فيها شي يا ابن الحلال
  • اخراس، يعني ليش اليوم بالذات لحتى خطرلكن تغنوها؟ صارلكن عشر سنين عم تغنوا سميرة وأنا الحاصودة، هلأ صار بدكن تغنوا هيك أغاني مغرضة؟
  • يا معلم الله يوفقك ويخليلك أولادك، والله ما بعرف شو قصدك، فهمني واذا كنت غلطان اعمل اللي بدك ياه.
  • يعني لأنو رفاقنا الروس خسروا وحدة من طياراتهن بحربهن ضد الإرهاب صرتو كلكن تتمسخروا؟ شعب قليل أدب وما بيقدّر تضحيات الأصدقاء.
  • يا معلم الله يسامحك، نحن ما بنقدّر، أصلاً نحنا ليل نهار عم نصلي الله يحفظ القائد بوتين، لولاه والله كانوا الإرهابيين بهدلونا، نحنا عم نغنيلها طيري، جكر بأردوغان، لأنو نحنا بنعرف إنو الرفيق بوتين بيقدر يغلبهن حتى بطيارات الورق، يا الله يا ولاد ع الدبكة لشوف: جاي تسنبل ورايا…

وقعدنا نحنا وهالعناصر ندبك لحتى دفينا، وكان قائد الدورية ماسك ع الاول ومبسوط… يا لطييييف شو كان مبسوط.

شاهد أيضاً

“أرشفة الحرب”.. صراع بين الأسد والمعارضة على ذاكرة السوريين

صدى الشام – ديما شلار تستمر الحرب بين المعارضة من جهة، والنظام وحلفائه من جهةٍ …

أرشيف فيلم “إلى سما” يتّجه للتحوّل إلى أدلّة على جرائم النظام في سوريا

صدى الشام – ديما شلّار يسعى فريق الفيلم الوثائقي “إلى سما” لتقديم المقاطع المصورة، وأرشيف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

twelve + 11 =