الآن
الرئيسية / ميديا / فضائيات / بالسوري الفَصيح

بالسوري الفَصيح

لك طلع عن جد بيعرف يروح على روسيا كنا مفكرين ما بيعرف طلع قبضاي واجدع
من العكيد أبو شهاب، لبستو مرتو هالطقم وقالتلو روح يالله ورجيهن كيف إنك فحل، وما
بتخاف من شي، يا الله يا ابو البيش، قام هالأبو البيش نط نطة وحدة صار بنص موسكو.
شو هالمراجل يا ضرسان، التلفزيون ما قصر، زيارة تاريخية قمة الزعيمين، عندما تلتقي
القامات الكبيرة، هلأ صحي أبو البيش أطول من أبو البوط بشوي، بس هني الاتنين قامات
كبيرة، بصراحة أي، وما حدا يقدر يقول غير هيك، يعني صحي ابو البيش ما بيمون على
حرستا وداريا ودوما، لك وأبعد زيارة محلية عملها كانت ع الزبلطاني، بس كل شي
لوحدو، يعني هو زعيم، على حي المهاجرين، وإلا أنا غلطان؟ شو مستقلين بحي
المهاجرين؟ أكيد مو مستقلين فيه، بس إنو الواحد بيقعد لوحدو وبيصفن شوي، إنو ممكن
حدا يخبرنا ليش راح على روسيا وشو كان بدو يساوي هونيك، ع التلفزيون عرضولنا اربع
دقايق ونص بالتمام والكمال، وقالوا هاي هي اللقاء الكامل لسيادتو مع بوتين، لك ما
حكوا شي، هداك قلو بنشكرك لأنك إجيت، والتاني قلوا بشكركن لأنكن إجيتو لعنا وعم
تقصفوا سوريا وما قصرتوا، معقولة طرق هالمشوار كلو منشان هالكلمتين، كان يبعت شي
حدا بدل ما يروح هوي ويخلي الناس كلها تحكي عليه، الفضائيات والأرضيات بهدلوا
سيادتو، مسحوا بكرامتو الأرض، أصلاً في ناس تقول كانت مستنية هالزيارة التاريخية
منشان يقولوا شفتو هادا رئيس هاد، لك هادا موظف عند بوتين، وإيمته ما بدو يستدعيه،
بس شو بدنا فيهن، عن جد كانت زيارة تاريخية، وعلى قد مانها تاريخية واحد على قناة
المنار طلع عم يقول إنها لح تغير شكل المنطقة، لك يا زلمة عن جد فرطتني من
الضحك… قال وجه المنطقة قال، لك كنت قول شي بينبلع، ع القليلة كنت قول غيرت شكل
المهاجرين لأنو صارلو صاحبكم خمس سنين معفن فيها… معفن عرفتو شلون يا فهمانين…

واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

الرئيسية / ميديا / فضائيات / بالسوري الفَصيح

بالسوري الفَصيح

من كم يوم طلبوا من
الولد بالمدرسة يجيب مية ليرة منشان المساهمة بدعم أسر الشهداء، هلأ المية ليرة
شغلة تافهة، بس أنا ما حبيت ادفعها، قمت رحت ع المدرسة وقابلت حضرة المديرة
المحترمة جداً جداً، وسألتها عن موضوع المية ليرة قام سلختني محاضرة عن الانتماء
للوطن، وضرورة دعم أسر الشهداء اللي ضحوا بأرواحهم منشان تضل سوريا بخير، وتخلص
الأزمة. بيني وبينكن وهي عم تحكي فلتت مني الضحكة، لأني كنت عم اتزكر من شي ألف
سنة لما كانوا يقولوا الأزمة خلصت، هلأ صاروا يقولوا منشان تخلص الأزمة. المهم شو
بدكن بالطويلة، المديرة سألتني ممكن أعرف ليش عم تضحك، قمت قلتلها لأني ما سمعت
بالتلفزيون إنو لازم ندفع مية ليرة، قام قالت لي هالشي مبادرة تطوعية منها، وما
إلها علاقة لا بالتلفزيون ولا بوزارة التربية، وهي حبت تعمل هالشي منشان تقول
للقيادة الحكيمة إنو المواطنين واقفين معاها جنباً إلى جنب في محاربة الإرهاب، قلت
لها طيب يا مدام تنين من ولاد عمي شهداء، صفنت شوي وسألتني ليش هني كانوا بجيش
الوطن، قلتلها لا والله كانوا بالجيش الحر، تبلكمت وما بقا تعرف شو بدها تحكي، هني
كمان شهداء مو هيك مدام، وإلا أنا غلطان، شو ما سمعتي الأستاز لافروف وهو عم يقول
إنو الجيش الحر لح يكون مساهم في الوصول إلى حل، ما سمعتي لافروف وهو عم يحكي عن
الجيش الحر، ما تقوليلي في وما في، إنتو هلأ بتسمعوا كلام ماما روسيا، وشو ما
بتقول ماما روسيا بتمشوا وراه متل التوتو، صرتوا تعلموا الولاد بالمدارس لغة
روسية، وعم تطالعوا أغاني روسية ع التلفزيون.

قالت لي وهي عم
تدفشني برات المكتب: بتعرف أستاز نحنا ما بقا بدنا المية ليرة، روح الله يرضى
عليك، لك أنا شو كان بدي بصرعة هالراس، قال مساهمة قال. لح يروحنا دبلكة منشان مية
ليرة… لك العما منيح ما طلبنا منك ألف كنت جيت شايل هداك العلم أبو عيون
حمر… وصرت تهتف سوريا حرة حرة بشار يطلع
برا… طلاع برا الله يستر عليك.

واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

الرئيسية / ميديا / فضائيات / بالسوري الفَصيح

بالسوري الفَصيح

يا جماعة اوعا حدا
يفكر اني بكره الروس، أو لا قدر الله ما بحبهن، لا بالعكس الروس كويسين وحبابين،
وما عملوا شي بحياتهن مو كويس، معليش بدكن تسامحوني هي هيه الحقيقة وإزا حدا عندو
غير حكي يشرف يجي ع الشام ويقول نص كلمة ع الروس ويشوف شو بيصير فيه. لك العما،
الجماعة نسيوا أبو زميرة وجماعتو، وهلأ ما عندهن شغلة ولا عملة غير يحكوا عن
بطولات الروس. واحد معنا بالشغل كان عم يحكي من يومين شي بيشبه غرندايزر الله
وكيلكن، قال وقام هالجندي الروسي حمل المدفع على ظهرو، وصار يركض، وقف على راس
التلة وقصف وهو حاطط المدفع على ظهرو، قصف هالجيش الألماني وإلا ماتوا شي الف واحد
من جماعة ميركل، هلأ صحي هو خربط بين ميركل وهتلر، بس بصراحة كل اللي كانوا قاعدين
بالمكتب كانوا مصدقين، وواحد قالوا إنو بيعرف القصة، وحلف مليون يمين إنو قراها
بكتاب الحطب والسلام تبع بولنستوي هلأ أنا ما سألتو مين هادا بولنستوي، منشان ما
يقول عني أجدب وما بعرف، بس حبيت اتفصحن وقلت لو بس مو كأنو تخينة شوي إنو يشيل
مدفع، يا زلمة يعني هاون ماشي الحال، بس مدفع والله تقيلة. ولسه ما كملت كلامي
لحتى هجموا علي الرفاق اتهامات وتخوين وشوي تانية لح يضربوني الله وكيلكن، إنو شو
قصدك، يعني الجيش الروسي مو بطل؟ يعني نحنا عم نألف قصص، لك لا والله يا شباب
الجيش الروسي أبطل الأبطال، ومافي أبطل منو بالعالم، بس والله المدفع تقيل، قام
واحد من الرفاق جعر جعرة هزتني، وقاللي وهو عم يزورني: إي شو مفكرو خروق، هدول جيش
بوتين، ولك انت ما بتعرف مين بوتين، هون حسيت بأني على بواب الشحطة ع الفرع قمت
رفعت راسي لفوق، وعدلت قبة قميصي، وقلت لو غلطان، أنا اللي بعرف الرئيس بوتين أنا
اللي بعرفو، وبعرف إنو بالحرب العالمية التانية نط من الطيارة ومسك واحد ألماني
كان هربان، واعتقلو، وقبل ما يقولوا ولا كلمة صرت غني أغنية الكاتيوشا…

واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

الرئيسية / ميديا / فضائيات / بالسوري الفَصيح

بالسوري الفَصيح

روسيا جوا وسورية برا… هالعنوان ضل معلق براسي طول الأسبوع الماضي. كنت
مارق جنب قهوة الحجاز، بتعرفوها ما هيك؟ ولقيت قدامي جريدة الوطن، إي الوطن ما
غيرا تبع الأستاز رامي مخلوف، وقريت هالعنوان بالخط العريض “روسيا جوا وسوريا
برا”، وقفت شي خمس دقايق مو فهمان شو عم اقرا، العما، معقولة يكتبوا هيك
عنوان بجريدة سورية، لك ويا ريت أي جريدة، الوطن يا جماعة، الوطن، شو سوريا برا
وروسيا جوا، كيف يعني؟

خلوني اشرحلكن وجهة نظري، لما بتقرا هيك عنوان وبتكون مو آكل، بيجوز
بيمرق عادي، بس لما تكون طارق صحن فول من عند المصري وطالع عم تتمختر متل ديك
الحبش، بيصير الموضوع شي تاني أكيد، طيب كيف سوريا برا؟ شلون يعني؟ حدا يشرحلي،
برا يعني برا، خلاص طلعت سوريا برا، وإجت روسيا وقعدت محلها؟ العما إذا صحي، طيب
أنا شو عم اعمل هون؟ وليش ما طلعت مع سوريا لبرا، معقولة تكون سوريا زبطت شي فيزا،
أو طلعت تهريب بالبحر، معقولة تكون هي كمان ركبت بشي بلم؟

يا زلمة والله شي بيحط العقل بالكف

روسيا جوا وسوريا برا

وإذا مو مصدقين هاي جبتلكن الجريدة منشان تشوفوا بعيونكن.

وما تواخذوني بدي الحق اطلع كمان برا، لأنو روسيا هي اللي صارت جوا.

بخاطركن.

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

11 + 4 =