الآن
الرئيسية / ميديا / فضائيات / بالسوري الفَصيح

بالسوري الفَصيح

بلش رمضان، كل عام وانتو بخير، ومتل كل رمضان بلشت الدعاوي على اللي وصل
البلد لهالمواصيل، الناس تعبانة، الناس مو لقيانة نكشة، الناس ما بقا عندها شي
تاكلوا، بس مع هيك عم يحمدوا الله، شعب بيستحمل لأنو عندو حلم كبير، حلم إنو يخلص
هالخراب كلو وترجع سوريا، هلأ هي ما رح ترجع متل ما كانت، بس رح ترجع لصحابها،
يعني بتروح هالعصابة ويرجعوا الناس على بيوتهن، يا حسرتي في ناس كتير ما بقا عندهن
لا بيت ولا شي، كلو راح، وفي عيلات كاملة راحت ما بقي منها حدا، خطي نحنا شو تعبنا
وشو خسرنا، بس طولوا بالكن شوي، ما شاء الله الدراما السورية طاحشة طحش، إييييه،
شو بدنا بكل شي صار المهم الدراما شغالة، شي عشرين مسلسل كل واحد أبيخ من التاني،
كزب وعلاك مصدي، ومسخرة، وتشليط، يا لطييييف قديش في تشليط، ممثلين وممثلات ما
تقول عايشين بالبلد مبسوطين وعاملين عمليات تجميل، ومرتاحين، الله وكيلكن بتفتحوا
التلفزيون من الصبح للمسا وما بيخلصوا المسلسلات، لأ وأحلى شي لما يقولوا ع
التلفزيون إنو المسلسل يعالج بعض جوانب الأزمة اللي تتعرض لها سوريا، بلله شو،
يعني لما تقولوا في نازحين وتوزيع مساعدات بتكونوا عم تحكوا ع الأزمة!! طيب يا
فنانين والبراميل المتفجرة مو أزمة؟ ليش ما حكيتوا عليها؟ ماشي بلاها البراميل،
طيب هالقصف اللي شغال ليل نهار على كل مكان مانو أزمة؟ طيب إنو شو اسمو لساتو قاعد
ع الكرسي وعم يقتل بالناس مو أزمة، قلتولي أزمة ما هيك، الله يلعنكن، وأزمة تخلع
رقبتكن واحد واحد ووحدة ووحدة، رمضان كريم ع السوريين، حتى لو فطروا خبزة وحبة
بندورة، بس لا تضحكوا عليهن، ولا تكزبوا عليهن، لأنو ما بقا حدا يقدر يكزب علينا،
خلاااااص.

واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

الرئيسية / ميديا / فضائيات / بالسوري الفَصيح

بالسوري الفَصيح

خير إن شاء الله من الصبح على طاخ وطيخ بس ما تكونوا مفكرين حالكن رايحين
تحاربوا يا شباب، وحدوا الله، شوية أوامر تكتيكية وتراجعوا، شغلة سهلة وما
بدها لبكة، لك ولشو اللبكة أصلاً إذا
كانوا هيك وإلا هيك رح يعتبروكن أبطال ويصرعوا راسنا بالأغاني الحماسية وعلى هادا
جيش الوطن، إي وعلى سيرة جيش الوطن، قال هادا يا سيدي لما الله كتب علي من غير
اليوم ورحت لأخدم جيش إجا فرزي والعياز بالله بالفرقة الرابعة، وبلشوا الشباب
يخوفوني أكلت هوا هاي فرقة المهمات الصعبة، هالحكي مو هلأ من شي عشر سنين، المهم
رحت على مقر الفرقة وهونيك استلمني واحد مساعد كرشو أكبر من كرش خال إمي الله
يرحمو اللي كان يعتبر الزلمة بلا كرش ما بيسوى قرش، أول ما شافني سألني ومن دون
مقدمات، إن تشو بتشتغل بالمدنية ولاك؟ تلبكت شوي، وخفت إي بشرفي خفت، يعني واحد
متل التور، ما بدو يخوفني وأنا قد السنفور متل ما كانوا قرايبي يقولوا، بلعت ريقي
وقريت المعوزات، وقلت لو بشتغل بالحريقة، ناولني طيارة ع الماشي، وكمل من دون ما
يوجعوا ضميرو مع إنو راسي صار يفتل فتل، قلت لي بالحريق؟ وشو بتحرق ولاك؟ لأ سيدي
ما بحرق أنا بياع قماش بمحل عمي. ضحك ضحكة مو طبيعية وانفرجت أساريرو، وسحبني ع
جنب وقللي بصوت واطي، رح أعطيك عنوان بيتي واليوم المسا بتمر لعتدي، لأنو مرتي
وبناتي عندهن عرس بعد شهر، وبدنا كم قطعة قماش، مر لعندي بعد السبعة، فهمت؟ فهمت
سيدي فهمت… بس مو لازم التحق بالخدمة؟

صار يضحك بكل ما الله عطاه، وقلي وهو يدفشني لبرات الفرقة، قلت لي تلتحق
بالخدمة مو هيك؟ يا حبيبي الوطن بحاجتك هونيك بالحريقة، أنت شو بدك تنفعني هون؟
روح حبيبي روح اعتبر حالك بإجازة، ولا تنسى الساعة سبعة عم استناك… لا تنسى جيب
معك شوية مساطر، يعني شي عشر خمسطعشر متر، شكلهن على زوقك، لا تتأخر ها.

حاضر سيدي

وهيك خدمتلكن هالوطن، خدمة غير شكل، ما ضل ولا ضابط بالفرقة ما لبست مرتو
فستان على حسابي، لأنو هادا جيش الوطن… يقصف عمركن انتو وهيك جيش.

واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

الرئيسية / ميديا / فضائيات / بالسوري الفَصيح

بالسوري الفَصيح

خلونا نرجع ع
البدايات، بتعرفوا البدايات صعبة كتير، يعني بداية كل شغلة بتكون مو مضمونة
.الواحد ازا مبلش مشروع تجاري بتشوفوه حاطط ايدو على قلبو وخايف يخسر، بس بعدين
بتكرج معو وبيريش، أو بيوقع على راسو وبيخسر، هلأ بكل شي بتكون البداية صعبة
وبعدين تسهل الأمور، إلا بثورتنا بلشت ما أحلاها، أغاني ومظاهرات، وكنا ما أحلانا
نتجمع براس هالحارة وبنستنى الشباب يجوا كلهن وبعدين نمشي ع الساحة صواتنا كانت
تهز الأرض، وما حدا قدنا، كانت أمي تسألنا لك وين رايحين يا شباب، بنرد عليها كلنا
بصوت واحد، رايحين نسقط النظام، وكنا نمشي ومانا خايفين من شي، لا مخابرات ولا جيش
ولا شي، وكنا نهتف واحد واحد الشعب السوري واحد، وشي واحد يكون صوتو حلو بيناتنا
بيغني أغنية سميح شقير، عنجد كانوا المخابرات بيخافوا منا، أول مرة استشهد حمدي،
رجعنا ع الحارة ونحنا متل النار، كنا ناويين نهجم عليهن بس فكرنا بعدين إنو هادا
اللي بدهن ياه، هني بدهن يانا نقاتلهن، لأنو صواتنا بتخوف أكتر من بواريدهن، رحنا
شيعنا حمدي، بالرجعة استشهد عصام ووائل، ولما شيعناهن استشهدوا خمس شباب، ما عاد
فكرنا بالأسماء، صرنا نفكر بالعدد، صاروا عشرين شهيد من حارتنا، وبعدين صاروا
خمسين، كل ما نشيع شهيد يستشهد غيرو، اعتقلوا نصنا، وبيني وبينكن صرنا نخاف شوي،
بس لما صاروا في شباب بالجيش الحر انبسطنا، قلنا صار في النا ناس يحمونا، وكانوا
يحمونا فعلاً، صاروا المخابرات متل الأرانب، مرة صاروا الولاد الصغار يعيطوا إجا
الجيش الحر، قاموا المخابرات هربوا، بشرفي كانوا المخابرات بيخافوا من اسم الجيش
الحر، لهون كان كل شي حلو، صرنا نهتف الله محيي الجيش الحر، ونحنا مبسوطين، بس
بعدين، إي أكيد كلكن بتعرفوا شو صار بعدين، صار كل شي صعب، كل شي بيخوف، صار في
حرب… صار في جيوش، وفصائل وكتائب وصار في ناس ما الهن شغلة ولا عملة إلا يحاربوا
الجيش الحر، كتير شباب هربوا لبرا، وكتير شباب ما حدا بيعرف شو صار فيهن، ما بقا
في مظاهرات لأنو صار في براميل، وصورايخ وكيماوي، صار في كل شي…

الله على هديك الأيام
شو كانت حلوة

يا ريت ترجع…

واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

الرئيسية / ميديا / فضائيات / بالسوري الفَصيح

بالسوري الفَصيح

بدي شي حدا براسو عقل
يفهمني، يشرحلي، بالألف باء شو عم بيصير، لأنو أنا خلاص العوض بسلامتكم ما بقى
عندي ولا فيوز شغال، خلاص، يعني معقولة بعد كل شي عم بيصير بيضل عندي عقل، أنا
وشششش، طلعت من البيت لقيت حالي راجع ع البيت بعد دقيقتين، مرتي مشغلة الغسالة من
دون كهربا، وبنتي عم تتفرج ع التلفزيون كمان، إي عم تتفرج ع التلفزيون عن جد، مع
إنو من تلت تيام ما شفنا الكهربا، هلأ ما حدا سألني ليش رجعت ع البيت بعد ما طلعت،
اسمعوا شو صار معي، وقفت ع الرصيف عم استنى الميكرو، لقيت جابي الكهربا عم يقرا العداد
قربت شوي شوي، قلت لو كيفك معلم؟ زورني وكمل شغلو، معو حق الزلمة، الشمس قوية وبدو
يخلص شغلو مو فاضي للحكي الفاضي تبع المواطنين، بس لأني نقاق سألتو من طرف مناخيري
معلم، في فاتورة شي؟ رجع زورني زورة أقوى من التانية، فتح الدفتر تبعو، واطلع ع
الفواتير، ناولني فاتورة، وكمل شغلو، ولما حطيت عيني بعين الفاتورة، حسيت كل شي
فيني انطفى، ما عاد فيني شي شغال، وأول شي انطفى فيوزات عقلي، عرفتو ليش أكيد،
لأنو الفاتورة جاية خمسة وتلاتين ألف، وخمسمية وعشرين ليرة، وسبعين قرش، لك أنا مو
قاهرني غير هالسبعين قرش، سبعين قرش يا عالم، منين بدي جيب سبعين قرش، لك وكيف
طلعت هالفاتورة إذا الكهربا ما عم تيجي إلا يومين تلاتة بالشهر؟ رفعت راسي ما لقيت
الجابي قدامي، فتت متل الصاروخ ع البيت وصرت عيط، لك طفوا البراد، طفوا الغسالة،
طفوا التلفزيون.. لك خربتوا بيتي، بس ما في كهربا، كيف بدنا نطفيها، ما بعرف،
طفوها… مرتي عرفت المصيبة لما شافت الفاتورة بإيدي، قالت لي طول بالك يا رجال،
بتنحل، إي طول بالك يا مواطن بتنحل، سبعين قرش منين بدي جيبها، يعني الخمسة
وتلاتين ألف وخمسمية وعشرين ليرة بتتأمن، بس منين بدي جيب السبعين قرش… الله لا
يوفقك يا وزير الكهربا، هلأ وقت قروشك؟ روحوا لك الله يطفيها بنورو..

واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

five × five =