الآن
الرئيسية / ميديا / فضائيات / بالسوري الفصيح

بالسوري الفصيح

أنا، وأعوذ بالله من قولة أنا، ما بقدر فكر بطريقة
إيجابية أبداً، طول عمري بشوف من الكاسة نصها الفارغ، هيك من لما كنت صغير لحتى
صرت كبير وعين الله عليي، بيقولوا بكرا تطلع نتائج الفحص بتخيل حالي راسب، مع إني
كون كاتب منيح بالفحص.

بيقولوا بكرا ما
بعرف شو نفس الشي الله وكيلكن، ومن يوم اللي بلشت الثورة لليوم كل ما بسمع خبر
بينطوا الناس ما بيحطوا لما بيسمعوه بقول بيني وبين حالي الله يجيرنا، أكيد في شي
بدو يصير، المدام بتقول عني متشائم ورفقاتي بيقولوا عني سوداوي، بس خليكن شاهدين
على اللي رح قولوا يا جماعة الخير القصة مو تشاؤم ولا سوداوية، القصة غير… هادا
يا سيدي من كم يوم، يعني مو من كم يوم بيجوز من كم شهر، يعني مو من كم شهر، بيجوز
من سنة ونص تقريباً، إي ما علينا، كنا قاعدين أنا وحدو ابن خالتي بالقهوة عم نلعب
طاولة زهر، وفجأة سمعنا صوت انفجار وهالناس كلها وقفت على اربعتها.

الله وكيلكن ما
ضل ابن مرا قاعد على كرسيو، إلا أنا لك حدو ابن خالتي صار برات القهوة وأنا قاعد
كامش هالبربيش وعم شد، المهم بعد شي خمس دقايق هديوا الناس ورجعوا على طاولاتهن
ورجع حدو وشو كان مخطوف ولونو أصفر، لما شافني قاعد قلي العما ضربك ما قمت ما
تحركت لتشوف شو صار، قلتلو شو صار يعني شي “عصابة إرهابية مسلحة” زتتلا
شي قنبلة بشي قرنة منشان تروع المواطنين الآمنين، وبما إني لا مواطن ولا آمن ما
تأثرت، صار حدو ينط ما يحط، هوي بيعرفني منيح أبرد من الأسكيمو، منشان هيك تركني،
وطلع لبرا شوي يمكن حكى تلفون ورجع، قالي شوف يا ابن خالتي هالمرة ما زبطت معك مو
عصابة إرهابية هالمرة أكبر بكتير، شو اللهم عافينا، قال هدول تنظيم إرهابي عالمي
في إلو فرع بسوريا وبدو ينفز مخطط إرهابي كبير.

وكل يوم تفجيرات
واللزي منو، سلختلكن ضحكة ما في أختها وقلتلو لحدو، لك سماع بالتمانينات انت كنت
لساتك صغير سمعنا متل هالحكي، كمان كان في مؤامرة كبيرة، وكمان كان في اعترافات ع
التلفزيون، وكمان كان حافظ أسد عم يبيع ويشتري باللحمة الوطنية شي هبرة وشي بعضمو،
متل ما عم يصير هلأ بس الفرق، منشان الأمانة إنو ما كان في فضائيات ولا كان في
موبايلات، ولا كان في دشات ولا شي، كانوا يموتوا الناس، ويطلع المزيع شو كان اسمو
مهران يوسف يمكن يحكي نفس الحكي اللي عم يحكوه هلأ، عصابات، تنظيم ما بعرف شو،
وبعدين عملوا استفتاء وبايع الشعب بطل الصمود اللي انتصر بحرب تشرين انت أكبر قدر،
مع إنو الجولان بإيد إسرائيل.

هلأ لا تسألني
كيف انتصر، بس بتقدر تسأل شي ألف شاعر كتبولنا قصائد طلعت من روسنا عن الانتصار
العظيم، ومن يوميتها لليوم ما في شي بيتغير، يعني يا ابن خالتي يا حبيبي بشار ابنو
لحافظ، وزمان كانوا يقولوا كلب خلف جرو طلع ألعن من أبيه، وإلا أنا غلطان.

واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

الرئيسية / ميديا / فضائيات / بالسوري الفصيح

بالسوري الفصيح

هلأ يمكن
رح تستغربوا بشو عم فكر، بس عنجد لما بسمع واحد عم يهتف بالروح بالدم نفديك يا شو
اسمك، بفكر بيني وبين حالي إنو شو هالبني آدم هاد، لك العما من شو مصنوع، كيف
بيقدر يفدي حدا بدمو، لك ولشو؟

هلأ أنا
واحد تفكيري غريب بعرف هالشي، بس عن جد يا جماعة شو هالبشر هاي؟ لك كيف بيطلعوا
بوجوه ولاهن؟، لك شلون أب أو أم بيعلموا ولادهن إنهن يكونوا عبيد لبني آدم متلهن،
يا ساتر، قال شو كلهن فداء السيد الرئيس، إي يلعنكن إنتو والسيد الرئيس تبعكن،
معقولة لك يا بني آدمين هيك بترضوا على حالكن تصيروا عبيد، لأ قال وبيركعوا
لصورتو، وأحلى شي اللي بدو يجاكرنا قال ويحط بوط عسكري على راسو، لك ولووووووووو
عن جد عم تجاكرنا، وحياة جوز خالتي عم تضحكونا عليكن، لك شو ما بتفكروا إنتو؟ لك
ما في براسكن عقل؟ لك شو هالهبل اللي إنتو فيه، وشو بتاكلوا قبل ما تناموا، معقولة
ست “محترمة” دارسة وعين الله عليها.

بتطلع ع التلفزيون وتقول إنو هي مستعدة تضحي
بحياتها منشان السيد الرئيس لك يقصف عمرك إنتي والسيد الرئيس، لك شو بتعلمي ولادك
الزغار؟ شو بتقوليلهن؟

وكيف إلك عين تقعدي مع جوزك بعد ما قلتي إنك
تفدي زلمة غيرو بروحك، لك وإذا جوزك ما جابلك قنينة غاز رح تقومي الدنيا عليه ومو
بعيدة تطلبي الطلاق منو، طيب ليش ما تقومي الدنيا على هداك، مو هوي السبب يا
فهمانة.

لأنو منين بدو جوزك يجيبلك غاز إذا كان
“سيد الوطن” تبعك خرب البلد كلها، وبعدين كيف بدو جوزك يشتغل إذا كان مو
قدران يوصل على شغلو بسبب الحواجز؟ لك وإذا اعتقلوه، بتصدقي إنو هو جزء من
المؤامرة الكونية، جوزك هاد، جوزك أبو ولادك، يقصف عمرك، روحي انبسطي اقطعي
شرايينك منشان هداك، وبقص إيدي إذا رح يبكي عليكي، بدك تفديه بحياتك ما هيك، بدك
تضحي بدمك، روحي الله لا يردك إنتي وأمثالك، مبسوطين بعد كل شي عملتو بالبلد؟
خربتوها وقعدتوا تتفرجوا على سيادتو وهوي بيضحك؟ صدقوني عم يضحك عليكن مو علينا،
لأنو نحنا ما بقا حدا يضحك علينا لا هوي ولا غيرو، لا من الشرق ولا من الغرب، لا
معارضة ولا نظام، نحنا هيك شعب نمرود ما بنصدق حدا، ومو مستعدين نفدي حدا مين ما
كان بدمنا، قال نفديه بدمنا قال!! سمعوا هالسمعة، وهوي بشو بدو يفدينا بالله؟.بجراباتو، مثلاً؟؟؟

واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

الرئيسية / ميديا / فضائيات / بالسوري الفصيح

بالسوري الفصيح

إي يا سيدي هادا الأسبوع الماضي قضيتو كلو قدام التلفزيون، صحي الكهربا بتيجي  وبتروح ومرات بتروح وما بتعود تيجي، بس شفتلي والله أعلم شي نص مليون لقاء وحوار واستطلاع وريبورتاج وتحقيق وما بعرف شو كمان، وكلها يا عين عمك عم تحكي عن الانتخابات، الله وكيلكن، شي بيشهي، طلع شعبنا حربوق وحريف ديمكراطية من يوم يومو، لك العما تقول راحوا درسوا شو لازم يحكوا، بتلاقي بياع خضرة عم يحكيلك عن التعددية السياسية، وبرامج الناخبين، وتلاقي ست ما بتعرف تقرا اسمها بتحكيلك ساعة عن صندوق الانتخاب اللي رح يبين للعالم كلو قديش نحنا شعب فهمان، وقدران يختار، لك ممثلين رقاصات شعارات، عفوا شاعرات، كلو عم يحكي عن الديمكراطية، إلا أنا تبلكمت هديك المرة وما عرفت احكي كلمتين ظراف، العما ضربني شو ناقصني لسان وإلا حصان؟ هلأ كلو كوم والمحللين كوم هدول بيشهوا الواحد كل يوم يعمل اننتخابات رئاسية، لك إي شو هاد، شي بيفلج عن جد مو مزح، فهمانين، كلام كبير ومهم، هادا بيحكي عن النقلة النوعية، وهادا بيحكي عن النقلة الحضارية، هلأ صحي كلن عم يحكوا عن نقلات بس حلوين وحياة جوز خالتي حلوين، وظراف كتير، معد محمد بيحكيلو كلمتين بيرد عليه طالب إبراهيم بيناولها لشريف شحادة، وكووووووووووول رونالدو، لأ عفواً ما تواخزوني بس قلبت التلفزيون بالغلط لشوف شو صار بنتيجة المباراة، وصدقوني أنا ما عم تابع الجزيرة الرياضية صحي هي غيرت اسمها وصارت بي إن سبورت بس على مين كاشفينكن عمي إنتو جزء من المؤامرة الكونية، لك حتى ريال مدريد مشارك معاكن، ما علينا، المهم بتطلع هاي الوزيرة الشماط بتحكي بتحكي وقديش هالديمقراطية رح تغير مفاهيم، وليكو ترا نحنا ما بنعرف مين رح يفوز بالانتخابات، والناخبين يعني حضراتنا نحنا اللي رح بنقرر مين رح يصير رئيس، بالله شو؟ عم تحكي جد وزيرة؟ شو صايرلك ما تكوني آخدة برد؟، نحنا بنقرر؟، إي روحي عنا عمي، وكووووووووووووووول كريستانو رونالدو.
واحد سوري

شاهد أيضاً

بشّار الأسد: لا أكترث لوصفي بـ”الحيوان”

قال بشار الأسد إنه لا يكترث لوصفه بالحيوان من قبل دونالد ترامب، زاعما في مقابلة …

إلى مستخدمي “تويتر”.. غيّروا كلمات السر فوراً!

نصحت شركة تويتر، مساء أمس أمس الخميس، جميع مستخدميها بتغيير كلمة السر، بعد كشف خلل …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

16 − 1 =